అసూయతో మహిళ హత్య కేసు ఛేదన: సీసీటీవీ, సాంకేతిక ఆధారాలతో నిందితుడి అరె…

దర్యాప్తు కొనసాగుతుండగా జూన్ 3న గ్రీన్ సిటీ సమీపంలోని రైల్వే ట్రాక్ పక్కన గుర్తు తెలియని మహిళ మృతదేహం లభించింది. కుటుంబ సభ్యులు మృతదేహాన్ని శ్యామలగా గుర్తించారు. మృతదేహం పూర్తిగా కుళ్లిపోవడంతో పాటు తలపై తీవ్ర గాయాలు ఉండటంతో కేసును హత్యగా నమోదు చేసి పోలీసులు అన్ని కోణాల్లో విచారణ చేపట్టారు.

ప్రత్యేక బృందాలు పరిసర ప్రాంతాల సీసీటీవీ ఫుటేజీలను నిశితంగా పరిశీలించగా మృతురాలితో కలిసి తిరుగుతున్న వ్యక్తిని గుర్తించారు. సాక్షులను విచారించడం, సాంకేతిక ఆధారాలు సేకరించడం, నిరంతర గాలింపుతో నిందితుడి కదలికలను గుర్తించారు.

విశ్వసనీయ సమాచారం మేరకు జూలై 17న కామారెడ్డి లేబర్ అడ్డా వద్ద అనుమానాస్పదంగా సంచరిస్తున్న వ్యక్తిని అదుపులోకి తీసుకున్నారు. మొదట తన పేరు "మామిడి రాజయ్య"గా చెప్పినా, విచారణలో అతని అసలు పేరు పిట్ట నర్సింలు అలియాస్ పిట్టల నర్సింలు, నిజామాబాద్ జిల్లా నవీపేట్ మండలం శిరాన్‌పల్లి గ్రామానికి చెందినవాడని తేలింది.

విచారణలో నిందితుడు నేరాన్ని అంగీకరించాడు. శ్యామలతో కొంతకాలంగా పరిచయం ఉండగా, ఆమెకు డబ్బులు కూడా ఇస్తుండేవాడని తెలిపాడు. ఆమె మరో వ్యక్తితో సన్నిహితంగా ఉండడాన్ని చూసి అసూయ పెంచుకున్న నిందితుడు గ్రీన్ సిటీ సమీపంలోని పొదల్లోకి తీసుకెళ్లి మద్యం సేవించిన అనంతరం వాగ్వాదం జరిగిందని, రాయితో తలపై బలంగా కొట్టి హత్య చేసినట్లు ఒప్పుకున్నాడు. అనంతరం ఆమె మొబైల్ ఫోన్‌ను రూ.200లకు విక్రయించి ఆ డబ్బుతో మద్యం కొనుగోలు చేసినట్లు వెల్లడించాడు.

నిందితుడు గతంలో కూడా కూలీ కార్మికులను నిర్మానుష్య ప్రాంతాలకు తీసుకెళ్లి దోపిడీలకు పాల్పడినట్లు విచారణలో తేలింది. నిజామాబాద్ నాలుగో టౌన్ పోలీస్ స్టేషన్‌లో దోపిడీ కేసు, బాసర పోలీస్ స్టేషన్ పరిధిలో హత్య కేసులో అరెస్టై జైలుకు వెళ్లి బెయిల్‌పై విడుదలైనట్లు పోలీసులు గుర్తించారు. ఆ కేసుల్లో కూడా "మామిడి రాజన్న" పేరుతో సంచరించినట్లు వెల్లడైంది.

ఈ క్లిష్టమైన కేసును ఛేదించిన టౌన్ సీఐ బి. నరహరి, ఏఎస్ఐ రంగారావు, కానిస్టేబుళ్లు కమలాకర్, రామస్వామి, సంపత్, రాజులను జిల్లా ఎస్పీ ఎం. రాజేష్ చంద్ర ప్రత్యేకంగా అభినందించారు. శాస్త్రీయ దర్యాప్తు, సాంకేతిక ఆధారాలు, సమన్వయంతోనే కేసును త్వరితగతిన ఛేదించగలిగామని ప్రశంసించారు.

కొత్తగా పరిచయమైన వ్యక్తులతో ఒంటరిగా నిర్మానుష్య ప్రాంతాలకు వెళ్లవద్దని పోలీసులు ప్రజలకు సూచించారు. కూలి పనులకు వెళ్లే మహిళలు, పురుషులు తమ కదలికలను కుటుంబ సభ్యులకు తెలియజేయాలని, అనుమానాస్పద వ్యక్తులు లేదా నేర సమాచారం తెలిసిన వెంటనే డయల్–112 లేదా సమీప పోలీస్ స్టేషన్‌కు సమాచారం అందించాలని కోరారు. ప్రజల ప్రాణ, ఆస్తి భద్రతకు జిల్లా పోలీసులు ఎల్లప్పుడూ కట్టుబడి ఉంటారని స్పష్టం చేశారు.