మల్లయ్య కొండ పరిరక్షణకు గిరి ప్రదక్షిణ: ఎమ్మెల్యేల భాగస్వామ్యం

అన్నమయ్య జిల్లా తంబళ్లపల్లి నియోజకవర్గంలోని పవిత్ర మల్లయ్య కొండ ప్రాంతంలో మైనింగ్ ప్రతిపాదనలను వ్యతిరేకిస్తూ సోమవారం (జూన్ 29) ఈ గిరి ప్రదక్షిణ నిర్వహించనున్నారు. ఉదయం 6 గంటలకు మల్లయ్య కొండ ఆలయంలో అభిషేకంతో కార్యక్రమం ప్రారంభమవుతుంది.

ఈ కార్యక్రమంలో తంబళ్లపల్లి ఎమ్మెల్యే పెద్దిరెడ్డి ద్వారకానాథ రెడ్డి, మాజీ ఎమ్మెల్యే కలిచర్ల ప్రభాకర్ రెడ్డి సోదరుడు కలిచర్ల సుధాకర్ రెడ్డి పాల్గొంటారు. అనంతరం కొండ దిగువన అల్పాహారం ఏర్పాటు చేశారు.

గిరి ప్రదక్షిణ గోపిదిన్నె, కొట్టాల క్రాస్, బండ్రేవు, ముసలికుంట, పెద్దమండెం మీదుగా కలిచర్లకు చేరుకుంటుంది. అక్కడ పోలేరమ్మ గుడి వద్ద మధ్యాహ్న భోజన ఏర్పాట్లు చేశారు. అనంతరం శివపురం, సిద్ధవరం, వెలిగల్లు, కోటకొండ క్రాస్ మీదుగా తంబళ్లపల్లికి చేరుకొని కార్యక్రమాన్ని ముగించనున్నారు.

మల్లయ్య కొండ పర్యావరణ పరిరక్షణ, ఆధ్యాత్మిక వారసత్వ సంరక్షణ లక్ష్యంగా నిర్వహిస్తున్న ఈ గిరి ప్రదక్షిణలో నియోజకవర్గంలోని అన్ని మండలాల ప్రజలు, భక్తులు, రైతులు, యువత, మహిళలు, ప్రజాప్రతినిధులు అధిక సంఖ్యలో పాల్గొని విజయవంతం చేయాలని నిర్వాహకులు పిలుపునిచ్చారు.