తిరుమల శ్రీవారి బ్రహ్మోత్సవాలు ఘనంగా ముగింపు: చక్రస్నానంతో పరిపూర్ణం

స్నపన తిరుమంజనం వివరాలు

విష్వక్సేనారాధన, పుణ్యాహవచనం, ఛత్రచామరాది రాజోపచారాలతో పాటు పాలు, తేనె, కొబ్బరినీళ్లు, పసుపు, గంధంతో పాటు శంఖనిధి, పద్మనిధి, సహస్రధార, కుంభధారలతో అభిషేకం చేశారు. ఈ సందర్భంగా టీటీడీ వేదపారాయణదారులు ఉపనిషత్తు, దశశాంతి, పురుషసూక్తం, శ్రీసూక్తం, భూసూక్తం మంత్రాలను పారాయణం చేశారు.

బ్రహ్మోత్సవాలు ఒక యజ్ఞస్వరూపం అని, యజ్ఞాంతంలో నిర్వహించే అవభృత స్నానం ద్వారా ఉత్సవ నిర్వహణలో జరిగిన లోపదోషాలు తొలగి సంపూర్ణ ఫలితాలు చేకూరుతాయని ఆగమ పండితులు తెలిపారు.

స్నపన తిరుమంజనం అనంతరం సుదర్శన చక్రత్తాళ్వార్లను పుష్కరిణికి తీసుకువచ్చి పవిత్ర జలాల్లో స్నానం చేయించారు. సుదర్శన చక్ర స్పర్శతో పుష్కరిణి జలాలు మరింత పావనమయ్యాయని భావిస్తూ వేలాది మంది భక్తులు పుణ్యస్నానాలు ఆచరించారు.

పాల్గొన్న ప్రముఖులు

ఈ కార్యక్రమంలో పెద్దజీయర్ స్వామి, చిన్నజీయర్ స్వామి, టీటీడీ ఈవో ముద్దాడ రవిచంద్ర, అదనపు ఈవో సిహెచ్ వెంకయ్య చౌదరి, జేఈవోలు డా. ఎ. శరత్, ప్రభల గోపీనాథ్, సీవీఎస్వో కే.వి. మురళీకృష్ణ తదితరులు పాల్గొన్నారు.