మదనపల్లెలో భార్య హత్య: బీర్ బాటిల్తో భర్త దాడి

జిల్లా మదనపల్లెలో దారుణ హత్య చోటుచేసుకుంది. పట్టణంలోని ఓ లాడ్జిలో భార్యను భర్తే బీర్ బాటిల్తో పొడిచి హత్య చేశాడు. ఈ ఘటన స్థానికంగా కలకలం రేపింది.

పోలీసులు తెలిపిన వివరాల ప్రకారం, కర్ణాటక రాష్ట్రం కోలార్ జిల్లా ముళబాగల్ కు చెందిన నవీద్ భాష అలియాస్ నవీన్ పాష తన భార్యతో కలిసి మదనపల్లెలోని ఓ లాడ్జిలో బస చేశాడు. గురువారం వారి మధ్య ఏదో విషయంలో ఘర్షణ జరిగింది.

మాటామాటా పెరిగి ఆగ్రహానికి గురైన నిందితుడు అక్కడే ఉన్న బీర్ బాటిల్ ను పగలగొట్టి, ఆ ముక్కలతో భార్యపై విచక్షణారహితంగా దాడి చేశాడు. తీవ్ర గాయాలతో బాధితురాలు అక్కడికక్కడే మృతి చెందింది.

పోలీసుల విచారణ

లాడ్జి సిబ్బంది గమనించి వెంటనే పోలీసులకు సమాచారం అందించారు. సమాచారం అందుకున్న మదనపల్లె వన్ టౌన్ పోలీసులు హుటాహుటిన ఘటనా స్థలానికి చేరుకుని పరిశీలించారు. మృతదేహాన్ని స్వాధీనం చేసుకుని, పోస్టుమార్టం నిమిత్తం మదనపల్లె జిల్లా ప్రభుత్వ ఆసుపత్రికి తరలించారు.

మృతురాలిని కర్ణాటకలోని ముళబాగల్ వాసిగా గుర్తించారు. నిందితుడు నవీద్ భాషను అదుపులోకి తీసుకుని విచారిస్తున్నారు. భార్యాభర్తల మధ్య గొడవే హత్యకు కారణమా లేక ఇతర కారణాలు ఏమైనా ఉన్నాయా అనే కోణంలో పోలీసులు దర్యాప్తు చేస్తున్నారు. ఈ ఘటనపై కేసు నమోదు చేశారు.