లీలా హోటల్స్ సామ్రాజ్యం విక్రయం: ఢిల్లీ ప్రాజెక్టే కొంపముంచిందా నాయర్ కుటుంబం వెల్లడించిన కీలక విషయాలు

భారతీయ బ్యాంకులు సాధారణంగా ఐదు నుంచి ఆరు సంవత్సరాల రుణ కాలపరిమితిని మాత్రమే అందించడంతో, పెద్ద హోటల్ ప్రాజెక్టులకు ఆర్థిక నిర్వహణ కష్టమైందని ఆయన వివరించారు. రుణాలను సక్రమంగా ప్రణాళిక చేసుకోకపోవడం వల్ల వడ్డీ భారం విపరీతంగా పెరిగిందని, ఢిల్లీ ప్రాజెక్టు తమ వ్యాపార పతనానికి ప్రధాన కారణమైందని ఆయన అభిప్రాయపడ్డారు.

లీలా హోటల్స్ సామ్రాజ్యాన్ని నిర్మించింది ఎవరు

లీలా హోటల్స్ వ్యవస్థాపకుడు కెప్టెన్ సీపీ కృష్ణన్ నాయర్. ఆయన 1986లో ముంబైలో తొలి లీలా హోటల్ను ప్రారంభించారు. అప్పటికి ఆయన వయసు సుమారు 65 సంవత్సరాలు. ప్రపంచంలోని ప్రముఖ విలాసవంతమైన హోటళ్లకు దీటుగా భారతీయ ఆతిథ్య రంగంలో హోటళ్లను నిర్మించాలన్నది ఆయన లక్ష్యం. ఆ ఆలోచనతో ముంబై, ఢిల్లీ, బెంగళూరు తదితర నగరాల్లో లీలా హోటల్స్ను అభివృద్ధి చేశారు. ఆయన కుమారులు వివేక్ నాయర్, దినేష్ నాయర్ కుటుంబ వ్యాపారంలో కీలక బాధ్యతలు నిర్వహించారు.

2019లో బ్రూక్ఫీల్డ్కు విక్రయం

భారీ అప్పుల నుంచి బయటపడేందుకు 2019లో లీలా హోటల్ వెంచర్ లిమిటెడ్ కీలక నిర్ణయం తీసుకుంది. కెనడాకు చెందిన బ్రూక్ఫీల్డ్ అసెట్ మేనేజ్మెంట్ ఆధ్వర్యంలో ఉన్న సంస్థకు తన హోటల్ వ్యాపారంలో ఎక్కువ భాగాన్ని విక్రయించేందుకు ఒప్పందం చేసుకుంది. ఈ ఒప్పందం విలువ సుమారు రూ.3,950 కోట్లు. ఈ ఒప్పందంలో భాగంగా ఢిల్లీ, బెంగళూరు, చెన్నై, ఉదయ్పూర్లోని లీలా హోటళ్లు, ఆగ్రాలో హోటల్ అభివృద్ధికి సంబంధించిన భూమి, హక్కులు, హోటళ్ల నిర్వహణ వ్యాపారం, సంబంధిత బ్రాండ్ హక్కులను బ్రూక్ఫీల్డ్కు బదిలీ చేశారు.

హోటళ్ల విక్రయం ద్వారా వచ్చిన మొత్తాన్ని ప్రధానంగా బ్యాంకులు, ఆర్థిక సంస్థల అప్పులు తీర్చేందుకు వినియోగించారు. 2019లో లావాదేవీ పూర్తయిన తర్వాత రుణదాతలు తమ బకాయిలను పూర్తిగా పరిష్కరించినట్లు విడుదల పత్రాలు ఇచ్చారు. ఆ సమయంలో లీలా సంస్థపై రూ.6,000 కోట్లకు పైగా అప్పులు ఉన్నట్లు నివేదికలు వెల్లడించాయి. అందువల్ల హోటళ్ల విక్రయం కుటుంబానికి అప్పుల సమస్య నుంచి బయటపడేందుకు కీలక మార్గంగా మారింది.