యూజీసీ 2026 నిబంధనలపై కేంద్రం కీలక నిర్ణయం.. సమీక్షకు ప్రత్యేక కమిటీ ఏర్పాటు యోచన

దేశవ్యాప్తంగా చర్చనీయాంశమైన యూనివర్సిటీ గ్రాంట్స్ కమిషన్ () 2026 ఈక్విటీ నిబంధనలను పునఃపరిశీలించేందుకు కేంద్ర ప్రభుత్వం ప్రత్యేక కమిటీని ఏర్పాటు చేయనుంది. ఈ విషయాన్ని సుప్రీంకోర్టుకు కేంద్రం తెలిపింది. విద్యాసంస్థల్లో విద్యార్థుల హక్కులు, ప్రయోజనాలు పరిరక్షించాలని సుప్రీంకోర్టు స్పష్టం చేసింది.

గురువారం జరిగిన విచారణలో కేంద్రం తరఫున సొలిసిటర్ జనరల్ తుషార్ మెహతా ఈ విషయాన్ని ధర్మాసనానికి వివరించారు. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం నిబంధనలను పునఃపరిశీలించాలని సూచించింది. ఏ ఒక్క వర్గం విద్యార్థులూ వివక్షకు గురవుతున్నామనే భావనకు లోనుకాకుండా నిబంధనలు ఉండాలని పేర్కొంది.

నిబంధనలపై అభ్యంతరాలు

ఈ ఏడాది యూజీసీ 2026 నిబంధనలను ప్రకటించింది. అయితే కుల ఆధారిత వివక్ష నిర్వచనంలో ఎస్సీ, ఎస్టీ, ఓబీసీ వర్గాల ప్రస్తావనకే ప్రత్యేక ప్రాధాన్యం ఇవ్వడం, జనరల్ కేటగిరీ విద్యార్థులకు తగిన ఫిర్యాదు పరిష్కార రక్షణ లేదనే అభ్యంతరాలు వ్యక్తమయ్యాయి. దీనిపై దేశవ్యాప్తంగా నిరసనలు కూడా జరిగాయి.

సుప్రీంకోర్టు ఆదేశాలు

ఈ నిబంధనలను సవాలు చేస్తూ దాఖలైన పిటిషన్లపై విచారణ సందర్భంగా సుప్రీంకోర్టు 2026 నిబంధనల అమలును నిలిపివేసింది. తదుపరి ఆదేశాలు వచ్చే వరకు 2012 నాటి నిబంధనలే కొనసాగాలని ఆదేశించింది.