వరి పంటల కోసం 18 గంటల త్రీఫేజ్ విద్యుత్: జిల్లా కన్వీనర్ సుతారి సుధాకర్

రైతులు పెట్టుబడులు పెట్టి, అప్పులు చేసి సాగు చేస్తున్న పంటలను కాపాడేందుకు ప్రభుత్వం, వ్యవసాయ శాఖ, విద్యుత్ శాఖ అధికారులు తక్షణ చర్యలు తీసుకోవాలని ఆయన కోరారు. రైతులకు కేటాయించిన వేళల్లో కోతలు, అంతరాయాలు లేకుండా నాణ్యమైన విద్యుత్ అందించాలని, సరఫరా సమయాలను ముందుగానే తెలియజేసి క్రమబద్ధీకరించాలని సూచించారు.

ట్రాన్స్ఫార్మర్లు వెంటనే మార్చాలి

ట్రాన్స్ఫార్మర్లు కాలిపోయినప్పుడు రోజుల తరబడి వేచి ఉండకుండా వెంటనే కొత్తవి ఏర్పాటు చేయాలని ఆయన కోరారు. సబ్స్టేషన్లు, విద్యుత్ లైన్లలో సమస్యలు తలెత్తినప్పుడు త్వరగా పరిష్కరించేందుకు ప్రత్యేక సిబ్బందిని అందుబాటులో ఉంచాలని అన్నారు. విద్యుత్, సాగునీటి కొరతతో పంటలు దెబ్బతిన్న ప్రాంతాల్లో ప్రత్యేక సర్వే నిర్వహించి రైతులకు తగిన నష్టపరిహారం అందించాలని ఆయన డిమాండ్ చేశారు.

సబ్స్టేషన్ల ముట్టడికి హెచ్చరిక

విద్యుత్ సమస్యలపై రైతులు ఫిర్యాదు చేసేందుకు ప్రత్యేక హెల్ప్లైన్ ఏర్పాటు చేసి, ఫిర్యాదులను సత్వరం పరిష్కరించాలని సుధాకర్ కోరారు. 12 గంటల నుంచి 18 గంటల త్రీఫేజ్ విద్యుత్ సరఫరాను వెంటనే అమలు చేయకపోతే రైతులతో కలిసి సంబంధిత విద్యుత్ సబ్స్టేషన్లను ముట్టడించాల్సి వస్తుందని ఆయన ప్రభుత్వాన్ని హెచ్చరించారు. రైతు బాగుంటేనే రాష్ట్రం బాగుంటుంది. పంటలకు నీరు, నీటికి విద్యుత్ అత్యవసరం అని పేర్కొన్నారు.