భారతదేశంలోని పరిశ్రమలు, గిడ్డంగులు, కార్పొరేట్ కార్యాలయాలు, గనుల్లో చట్టపరమైన నిబంధనల అమలుపై ఆందోళనకర అంశాలు వెలుగులోకి వచ్చాయి. ప్రముఖ సంస్థలు నిర్వహిస్తున్న 52 పని ప్రదేశాల్లో 17 రాష్ట్రాలు, కేంద్రపాలిత ప్రాంతాల పరిధిలో చేపట్టిన తనిఖీల్లో మొత్తం 4,694 నిబంధనల అమలు లోపాలు గుర్తించినట్లు టీమ్లీజ్ రెగ్టెక్ నివేదిక వెల్లడించింది. ఒక్కో పని ప్రదేశంలో సగటున 90 లోపాలు ఉన్నట్లు నివేదిక పేర్కొంది.
ఈ అధ్యయనంలో పరిశీలించిన ప్రతి పని ప్రదేశంలోనూ ఏదో ఒక స్థాయిలో నిబంధనల అమలులో లోపాలు కనిపించాయి. వీటివల్ల సంస్థలకు ఆర్థిక జరిమానాలతో పాటు చట్టపరమైన చర్యలు ఎదురయ్యే ప్రమాదం ఉందని నివేదిక హెచ్చరించింది. కొన్ని సందర్భాల్లో కంపెనీ డైరెక్టర్లు, సీనియర్ అధికారుల వ్యక్తిగత బాధ్యత కూడా తలెత్తవచ్చని వివరించింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
70 శాతం లోపాలు శిక్షార్హమైనవే
టీమ్లీజ్ రెగ్టెక్ నివేదిక ప్రకారం, గుర్తించిన మొత్తం లోపాల్లో సుమారు 70 శాతం శిక్షార్హమైన నేరాల పరిధిలోకి వస్తాయి. దాదాపు 46 శాతం ఉల్లంఘనలకు జైలు శిక్ష విధించే అవకాశం ఉందని నివేదిక తెలిపింది. అంతేకాకుండా, 29 శాతం లోపాలకు సంబంధించి కంపెనీ డైరెక్టర్లు లేదా ఉన్నతాధికారులపై వ్యక్తిగత బాధ్యత విధించే అవకాశం ఉందని పేర్కొంది. మరో 31 శాతం ఉల్లంఘనలకు రోజులు గడిచేకొద్దీ పెరిగే జరిమానాలు వర్తించవచ్చని వెల్లడించింది.
