ప్రొద్దుటూరు ప్రభుత్వ పాలిటెక్నిక్ కళాశాల, డిప్లొమా ఇన్ కంప్యూటర్ ఇంజనీరింగ్ మరియు డిప్లొమా ఇన్ ఎలక్ట్రానిక్స్ అండ్ కమ్యూనికేషన్ ఇంజనీరింగ్ (ECE) కోర్సులకు నేషనల్ బోర్డ్ ఆఫ్ అక్రిడిటేషన్ (NBA) నుండి జాతీయ స్థాయి గుర్తింపు పొందింది. ఈ గుర్తింపు జనవరి 1, 2026 నుండి మూడు సంవత్సరాల పాటు అమలులో ఉంటుంది.
కళాశాల ప్రిన్సిపాల్ పాలెం గురుమూర్తి రెడ్డి ఈ విషయాన్ని అధికారికంగా ప్రకటించారు. NBA నిపుణుల బృందం కళాశాలను సందర్శించి, అకడమిక్ ప్రమాణాలు, బోధనా పద్ధతులు, మౌలిక సదుపాయాలు మరియు విద్యార్థుల ప్రతిభను పరిశీలించిన తర్వాత ఈ గుర్తింపును మంజూరు చేసింది. ఈ పరిశీలన ఈ ఏడాది జనవరి 30 నుండి ఫిబ్రవరి 1 వరకు జరిగింది.
ఈ గుర్తింపు కళాశాల బోధనా ప్రమాణాలకు, మౌలిక సదుపాయాలకు నిదర్శనమని ప్రిన్సిపాల్ తెలిపారు. జాతీయ స్థాయిలో గుర్తింపు పొందడం వల్ల విద్యార్థులకు భవిష్యత్తులో ఉన్నత విద్య మరియు ఉద్యోగ అవకాశాలు మెరుగుపడతాయని ఆయన ఆశాభావం వ్యక్తం చేశారు.
ఈ ఘనత సాధించడంలో బోధన మరియు బోధనేతర సిబ్బందితో పాటు విద్యార్థుల సమిష్టి కృషి కీలకమని ప్రిన్సిపాల్ కొనియాడారు. కళాశాల సాధించిన ఈ విజయానికి కృషి చేసిన ప్రతి ఒక్కరినీ ఆయన అభినందించారు.
