2026 నాటికి టిబి నిర్మూలనకు సమన్వయం: కలెక్టర్ ఆశిష్ సంగ్వాన్

జిల్లాలో టిబి నిర్మూలన కార్యాచరణ ప్రణాళిక (Roadmap) అమలుపై నిర్వహించిన సమీక్షలో కలెక్టర్ మాట్లాడుతూ, టిబి వ్యాధిపై ప్రజల్లో విస్తృత అవగాహన కల్పించడంతో పాటు, ప్రతి అనుమానిత వ్యక్తికి సకాలంలో పరీక్షలు నిర్వహించి, నిర్ధారణ అయిన ప్రతి రోగికి నాణ్యమైన చికిత్స అందేలా చర్యలు చేపట్టాలని అధికారులను ఆదేశించారు.

వ్యాధి ప్రభావం అధికంగా ఉన్న ప్రాంతాలను గుర్తించి ప్రత్యేక కార్యాచరణ చేపట్టాలని, అధిక ప్రమాదంలో ఉన్న వర్గాలకు కఫం పరీక్షలు, ఎక్స్‌రే తదితర నిర్ధారణ సేవలను విస్తృతంగా అందించాలని సూచించారు. టిబి రోగులతో సన్నిహితంగా ఉన్న కుటుంబ సభ్యులు, ఇతర పరిచయ వ్యక్తులకు కాంటాక్ట్ ట్రేసింగ్ నిర్వహించి, అవసరమైన వారికి టిబి నివారణ చికిత్స (TPT) అందించాలని తెలిపారు.

హెచ్‌ఐవి, మధుమేహం వంటి వ్యాధులతో బాధపడుతున్న వారిలో తప్పనిసరిగా టిబి స్క్రీనింగ్ నిర్వహించాలని, చికిత్స ప్రారంభించిన ప్రతి రోగి పూర్తిస్థాయిలో మందులు వాడేలా నిరంతర పర్యవేక్షణ చేపట్టాలని కలెక్టర్ పేర్కొన్నారు. చికిత్సను మధ్యలో నిలిపివేయకుండా చూడడం ద్వారా రోగులు పూర్తిగా కోలుకునేలా చర్యలు తీసుకోవాలని అన్నారు.

పౌష్టికాహార సహాయం కోసం ప్రభుత్వం అందించే డైరెక్ట్ బెనిఫిట్ ట్రాన్స్‌ఫర్ (DBT) నిధులు అర్హులైన రోగుల బ్యాంకు ఖాతాల్లో సకాలంలో జమయ్యేలా చర్యలు తీసుకోవాలని సూచించారు.

టిబి నిర్మూలనలో ప్రభుత్వ, ప్రైవేట్ ఆసుపత్రులు, ప్రైవేట్ వైద్యుల భాగస్వామ్యం ఎంతో కీలకమని పేర్కొన్న కలెక్టర్, ప్రతి టిబి కేసును తప్పనిసరిగా నమోదు చేసి, సమగ్ర వైద్య సేవలు అందించేందుకు అందరూ బాధ్యతాయుతంగా పనిచేయాలని అన్నారు.

టిబి నిర్మూలన కార్యక్రమ పురోగతిపై ప్రతి నెలా జిల్లా వైద్య మరియు ఆరోగ్య శాఖ ఆధ్వర్యంలో మెడికల్ ఆఫీసర్లు, సూపర్‌వైజరీ సిబ్బంది, టిబి నియంత్రణ సిబ్బందితో సమీక్షా సమావేశాలు నిర్వహించి, లక్ష్యాల సాధనకు అవసరమైన చర్యలను వేగవంతం చేయనున్నట్లు తెలిపారు.

టిబి రహిత కామారెడ్డి జిల్లాగా తీర్చిదిద్దేందుకు ప్రతి శాఖ, ప్రతి వైద్య సిబ్బంది, ప్రజాప్రతినిధులు, స్వచ్ఛంద సంస్థలు, ప్రైవేట్ వైద్యులు మరియు ప్రజలందరూ భాగస్వాములు కావాలని జిల్లా కలెక్టర్ ఆశిష్ సంగ్వాన్ పిలుపునిచ్చారు. టి.బి.కేసుల కు తప్పనిసరిగా కావాల్సిన పోషకాహార సహాయం కోసం ఫుడ్ బాస్కెట్ లు సరఫరా చేయడానికి ప్రతీ జిల్లా అధికారి, ఇతర ఉద్యోగులు, స్వచ్చంద సేవా సంస్థలు, రైస్ మిల్లర్స్ అసోసియేషన్ వారు, ఐ.ఎం.ఏ. తదితర రంగాల వారు ముందుకు వచ్చి అట్టి టీ. బి.కేసులకు ఫుడ్ బాస్కెట్ ల కొరకు దత్తత ప్రాతిపదికన వారికి ఫుడ్ బాస్కెట్ లు అందించడానికి తగు ఏర్పాట్లు చేయాలని జిల్లా కలెక్టర్ గారు సూచించారు.