డాక్సిన్ టైమ్స్: లాస్ ఏంజెలెస్ మేయర్గా నిత్యా రామన్.. అమెరికాలో చరిత్ర సృష్టించిన భారత సంతతి మహిళ

భారత్లో సామాజిక సేవతో ప్రారంభమైన ప్రయాణం

భారత్లో ఉన్న సమయంలో ఢిల్లీలో మురికివాడల ప్రజల సమస్యలపై పనిచేసే స్వచ్ఛంద సంస్థలతో కలిసి నిత్యా రామన్ పనిచేశారు. 2010 కామన్వెల్త్ క్రీడల ముందు మురికివాడల తొలగింపునకు వ్యతిరేకంగా జరిగిన ఉద్యమాల్లోనూ పాల్గొన్నారు. అనంతరం చెన్నైకి వెళ్లి అదే ఏడాది ట్రాన్స్పరెంట్ చెన్నై అనే స్వచ్ఛంద సంస్థను స్థాపించారు. నగరంలోని పేద ప్రాంతాల్లో పారిశుద్ధ్య సదుపాయాల కొరతను గుర్తించేందుకు సమాచారాన్ని సేకరించడం, ప్రభుత్వ మరుగుదొడ్ల వివరాలను నమోదు చేయడం, బస్సు మార్గాలను గుర్తించడం వంటి కార్యక్రమాలు చేపట్టారు. పేదల నివాస ప్రాంతాల తొలగింపునకు దారితీసే విధానాలను కూడా వ్యతిరేకించారు.

అమెరికాలో రాజకీయ ప్రస్థానం

2013లో నిత్యా రామన్ తిరిగి లాస్ ఏంజెలెస్కు వెళ్లారు. అక్కడ నగర పరిపాలనా కార్యాలయంలో పనిచేశారు. నగరంలో నిరాశ్రయుల సమస్యపై అధ్యయనం చేసే బాధ్యతలు చేపట్టారు. ఈ క్రమంలో 2017లో నిరాశ్రయులకు సహాయం అందించేందుకు ఎస్ఈఎల్ఏహెచ్ నైబర్హుడ్ హోమ్లెస్ కోలిషన్ను సహస్థాపించారు. నిరాశ్రయులకు ఆశ్రయం, గృహ వసతి, అవసరమైన సేవలు అందించడంపై ఆమె ప్రత్యేకంగా దృష్టి సారించారు. ఈ అనుభవమే ఆమెను రాజకీయాల వైపు నడిపించింది. 2020లో లాస్ ఏంజెలెస్ నగర కౌన్సిల్ ఎన్నికల్లో పోటీ చేసి అప్పటి సభ్యుడు డేవిడ్ ర్యూను ఓడించారు. 17 ఏళ్ల తర్వాత పదవిలో ఉన్న కౌన్సిల్ సభ్యుడిని ఓడించిన తొలి ప్రత్యర్థిగా గుర్తింపు పొందారు. ఆ ఎన్నికతో నగర కౌన్సిల్కు ఎన్నికైన తొలి దక్షిణాసియా వ్యక్తిగా, తొలి ఆసియా అమెరికన్ మహిళగా మరో ఘనత సాధించారు. 2024లో మరోసారి ఎన్నికై తన స్థానాన్ని నిలబెట్టుకున్నారు.

2020 ఎన్నికల్లో నిత్యా రామన్కు ప్రస్తుత మేయర్ కరెన్ బాస్ నుంచి గట్టి పోటీ ఎదురైంది. అయితే నగరంలో పెరుగుతున్న ఇళ్ల అద్దెలు, నిరాశ్రయుల సమస్య, అగ్నిప్రమాదాల నిర్వహణ, ప్రజలకు అందాల్సిన మౌలిక సదుపాయాల విషయంలో ప్రభుత్వ పనితీరుపై అసంతృప్తి ఆమెకు కలిసివచ్చింది. ప్రచారంలో నిత్యా రామన్ గృహ వసతి అందుబాటులో ఉండేలా చర్యలు తీసుకోవడం, నిరాశ్రయులకు ఆశ్రయం కల్పించడం, పోలీసు వ్యవస్థలో సంస్కరణలు తీసుకురావడం వంటి అంశాలను ప్రధానంగా ప్రస్తావించారు. రోడ్లపై గుంతల మరమ్మతులు, వీధి దీపాల నిర్వహణ, ప్రజా సేవలను మెరుగుపరుస్తానని హామీ ఇచ్చారు. ఎన్నికల ఫలితాల్లో నిత్యా రామన్ 52 శాతం ఓట్లతో ముందంజలో నిలవగా, కరెన్ బాస్కు 48 శాతం ఓట్లు వచ్చాయి. ఓట్ల లెక్కింపు కొనసాగుతున్న సమయంలోనూ రామన్ ఆధిక్యం నిలిచింది. దీంతో కరెన్ బాస్ తన ఓటమిని అంగీకరించారు.

లాస్ ఏంజెలెస్ నగరానికి మేయర్గా బాధ్యతలు చేపట్టనున్న నిత్యా రామన్ ముందు పలు కీలక సవాళ్లు ఉన్నాయి. ముఖ్యంగా నిరాశ్రయుల సమస్య పరిష్కారం, సామాన్యులకు అందుబాటు ధరల్లో ఇళ్ల నిర్మాణం, నగరంలో భద్రత, రహదారులు, పారిశుద్ధ్య సదుపాయాల అభివృద్ధిపై ఆమె దృష్టి సారించాల్సి ఉంటుంది. 2025లో పాలిసేడ్స్, ఈటన్ ప్రాంతాల్లో సంభవించిన అగ్నిప్రమాదాల తర్వాత పునర్నిర్మాణ పనులు కూడా కీలకంగా మారాయి. బాధితులకు సహాయం అందించడం, ఇళ్ల పునర్నిర్మాణానికి అనుమతుల ప్రక్రియను వేగవంతం చేయడం ఆమెకు ముఖ్యమైన బాధ్యత కానుంది. మరోవైపు 2028లో లాస్ ఏంజెలెస్ నగరం ఒలింపిక్ క్రీడలకు ఆతిథ్యం ఇవ్వనుంది. ఈ నేపథ్యంలో నగర మౌలిక సదుపాయాలు, రవాణా, భద్రత, పర్యాటక ఏర్పాట్లను మెరుగుపరచాల్సి ఉంటుంది.

భారత్లో సామాజిక సేవా కార్యక్రమాలతో ప్రారంభమైన నిత్యా రామన్ ప్రయాణం అమెరికాలోని ప్రముఖ నగరానికి మేయర్గా ఎన్నికయ్యే స్థాయికి చేరడం విశేషం. భారత సంతతి మహిళగా ఆమె సాధించిన ఈ విజయం అంతర్జాతీయంగా చర్చనీయాంశమైంది.