పశ్చిమాసియాలో ఉద్రిక్తతల నేపథ్యంలో కీలకమైన హోర్ముజ్ జలసంధిని రెండు రోజుల్లో తిరిగి తెరిచేందుకు సిద్ధంగా ఉన్నామని ఇరాన్ ప్రకటించింది. అయితే, అమెరికా తమ షరతులను అంగీకరిస్తేనే ఈ చర్యలు ఉంటాయని స్పష్టం చేసింది. గతంలో ప్రతిపాదించిన ఏడు రోజుల ప్రణాళికను రెండు రోజులకు తగ్గించే అవకాశాన్ని పరిశీలిస్తున్నట్లు ఇరాన్ విదేశాంగ శాఖ అధికార ప్రతినిధి ఇస్మాయిల్ బఘాయీ తెలిపారు.
అమెరికా తమ డిమాండ్లను అంగీకరిస్తేనే హోర్ముజ్ జలసంధిలో నౌకాయాన భద్రతను పునరుద్ధరించి, రవాణాను తిరిగి ప్రారంభించేందుకు వీలుంటుందని ఇరాన్ పేర్కొంది. తమ డిమాండ్లలో ప్రధానంగా అమెరికా విధించిన నౌకాదళ దిగ్బంధనాన్ని ఎత్తివేయడం, ఇరాన్పై ఆంక్షలను సడలించడం, విదేశాల్లో నిలిపివేసిన ఇరాన్ ఆస్తులను విడుదల చేయడం, చమురు రంగంపై ఆంక్షలను తొలగించడం వంటివి ఉన్నాయని అంతర్జాతీయ వార్తా సంస్థలు వెల్లడించాయి. పశ్చిమాసియాలో యుద్ధాన్ని అన్ని రంగాల్లో ముగించాలన్న డిమాండ్ను కూడా ఇరాన్ ముందుకు తెచ్చింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఖతార్ మధ్యవర్తిత్వంతో చర్చలు
అమెరికా, ఇరాన్ మధ్య ఖతార్ మధ్యవర్తిత్వంతో సంప్రదింపులు కొనసాగుతున్నాయి. ఇరాన్ విదేశాంగ మంత్రి అబ్బాస్ అరాఘ్చీ తెలిపిన వివరాల ప్రకారం, మొదట ప్రతిపాదించిన ఏడు రోజుల ప్రణాళికను రెండు రోజుల్లో అమలు చేసేలా మార్చే అంశంపై చర్చలు జరిగాయి. ప్రతిపాదన ప్రకారం.. మొదటి రోజు అమెరికా కొన్ని చర్యలు చేపట్టాలి. రెండో రోజు హోర్ముజ్ జలసంధిని తిరిగి తెరిచి, నౌకల రాకపోకలను సాధారణ స్థితికి తీసుకురావాలన్నది ఇరాన్ ఆలోచనగా ఉంది. అయితే దీనిపై ఇరు దేశాల మధ్య తుది ఒప్పందం కుదరలేదు.
