అంతర్జాతీయ టీ దినోత్సవం: టీ కేవలం పానీయం కాదు, మన జీవితంలో ఒక భాగం

ప్రపంచవ్యాప్తంగా మే 21న అంతర్జాతీయ టీ దినోత్సవాన్ని జరుపుకుంటారు. ఈ సందర్భంగా, టీ కేవలం ఒక పానీయం మాత్రమే కాదని, అది మన సంస్కృతిలో, దైనందిన జీవితంలో ఒక అంతర్భాగమని చెప్పవచ్చు. వివిధ సందర్భాలలో టీ మనకు ఎలా తోడుగా ఉంటుందో ఈ కథనంలో తెలుసుకుందాం.

మన దేశంలో టీ తాగడానికి ప్రత్యేక కారణం అవసరం లేదు. తలనొప్పి నుంచి ఆఫీసు ఒత్తిడి వరకు, వర్షం నుంచి స్నేహితుల కలయిక వరకు.. ప్రతి సందర్భానికీ టీనే ఒక పరిష్కారంగా మారుతుంది. సంతోషం, బాధ, నిద్ర.. ఇలా ఏ భావనతో ఉన్నా 'ఒక స్ట్రాంగ్ చాయ్' చెప్పమని అడగడం సర్వసాధారణం.

టీలో కూడా ఎన్నో రకాలున్నాయి. అల్లం, యాలక్కాయల టీ, ఇరానీ చాయ్, గ్రీన్ టీ, లెమన్ టీ, కటింగ్ చాయ్.. ఇలా ప్రతి రకం టీ తాగేవారి మూడ్‌కు, అభిరుచికి తగ్గట్టుగా ఉంటుంది. హైదరాబాద్‌లో ఇరానీ చాయ్, ఉస్మానియా బిస్కెట్ కాంబినేషన్ ఎంతో ప్రసిద్ధి చెందింది. ఆరోగ్య స్పృహ ఉన్నవారు గ్రీన్ టీ, లెమన్ టీ వైపు మొగ్గు చూపుతారు.