డాక్సిన్ టైమ్స్: ఉత్తరాఖండ్లో మరోసారి బీజేపీదే అధికారం: అమిత్ షా

ఓటరు జాబితాల నుంచి, దేశం నుంచి చొరబాటుదారులను తొలగించాలని అన్నారు. హల్ద్వానీలో 29 ఎకరాల ప్రభుత్వ భూమిలో ఆక్రమణల తొలగింపునకు చర్యలు తీసుకున్నప్పుడు రాహుల్ గాంధీ అభ్యంతరం వ్యక్తం చేశారని ఆరోపించారు. కాంగ్రెస్ అధికారంలో ఉన్నప్పుడు ముస్లిం విశ్వవిద్యాలయం ఏర్పాటు గురించి మాట్లాడుతుందని, బీజేపీ మాత్రం ప్రభుత్వ భూములను ఆక్రమణల నుంచి విముక్తం చేస్తోందని వ్యాఖ్యానించారు.

ఉత్తరాఖండ్ను సురక్షితమైన, సంపన్నమైన రాష్ట్రంగా తీర్చిదిద్దడంతో పాటు దేవభూమిని దేశ సాంస్కృతిక రాజధానిగా అభివృద్ధి చేయడమే బీజేపీ లక్ష్యమని అమిత్ షా పేర్కొన్నారు. రాష్ట్రంలో పర్యాటక రంగం 380 శాతం వృద్ధి సాధించిందని ఆయన వెల్లడించారు. కొండ ప్రాంతాల నుంచి ప్రజల వలసలను అరికట్టేందుకు ప్రభుత్వం చర్యలు తీసుకుంటోందని చెప్పారు.

గతంలో రాష్ట్ర ఆర్థిక వ్యవస్థ ఇతర ప్రాంతాల నుంచి వచ్చే నగదుపై ఆధారపడేదని, ఇప్పుడు పరిశ్రమలు, స్థానిక ఆదాయ వనరుల అభివృద్ధిపై దృష్టి పెట్టామని తెలిపారు. సరిహద్దు ప్రాంతాల అభివృద్ధి గురించి ప్రస్తావిస్తూ, గతంలో చైనా చొరబాట్ల భయంతో సరిహద్దు ప్రాంతాల్లో రహదారుల నిర్మాణానికి కాంగ్రెస్ ప్రభుత్వం ప్రాధాన్యం ఇవ్వలేదని ఆరోపించారు. ప్రధాని నరేంద్ర మోదీ నాయకత్వంలో సరిహద్దుల్లో భద్రతను బలోపేతం చేశామని చెప్పారు.

2016 సర్జికల్ స్ట్రైక్స్, 2019 వైమానిక దాడులు, 2025 ఆపరేషన్ సిందూర్ను ప్రస్తావిస్తూ దేశ భద్రత విషయంలో కేంద్ర ప్రభుత్వం కఠినంగా వ్యవహరిస్తోందని అన్నారు. వైబ్రంట్ విలేజెస్ కార్యక్రమం కింద 51 సరిహద్దు గ్రామాల్లో రూ.270 కోట్ల విలువైన అభివృద్ధి పనులు చేపట్టినట్లు తెలిపారు.

ఉత్తరాఖండ్ రాష్ట్ర ఏర్పాటులో మాజీ ప్రధాని అటల్ బిహారీ వాజ్పేయి కీలక పాత్ర పోషించారని అమిత్ షా గుర్తుచేశారు. 2000లో ప్రత్యేక రాష్ట్రంగా ఉత్తరాఖండ్ ఏర్పడిందని, రాష్ట్ర సాధన కోసం పోరాడి ప్రాణాలు కోల్పోయిన ఉద్యమకారులకు నివాళులర్పించారు. రాష్ట్ర ఏర్పాటుకు కాంగ్రెస్, సమాజ్వాదీ పార్టీలు అడ్డంకులు సృష్టించాయని విమర్శించారు.

సభలో మాట్లాడిన ముఖ్యమంత్రి పుష్కర్ సింగ్ ధామి కూడా కాంగ్రెస్పై విమర్శలు చేశారు. ఎన్నికల్లో ఓడిపోయినప్పుడు కొందరు ఈవీఎంలు, ఎన్నికల ప్రక్రియపై అనుమానాలు వ్యక్తం చేస్తున్నారని అన్నారు. తమ ప్రభుత్వం వంద మందికి పైగా పరీక్షల మాఫియాకు చెందినవారిని జైలుకు పంపిందని, 35 వేల మందికి పైగా యువతకు ప్రభుత్వ ఉద్యోగాలు కల్పించిందని తెలిపారు. పరీక్షల్లో అక్రమాలకు తావులేకుండా నిర్వహించామని పేర్కొన్నారు. ఉత్తరాఖండ్కు చెందిన జాతీయ భద్రతా సలహాదారు అజిత్ దోవల్పై రాహుల్ గాంధీ చేసిన వ్యాఖ్యల విషయంలో కాంగ్రెస్ నేతలు ఎందుకు స్పందించడం లేదని ధామి ప్రశ్నించారు.