ఎన్ఫోర్స్మెంట్ డైరెక్టరేట్ (ED) మనీలాండరింగ్ నిరోధక చట్టం (PMLA) కింద అనిల్ అంబానీకి చెందిన ముంబైలోని విలాసవంతమైన నివాసం 'అబోడ్'ను జప్తు చేసింది. ఈ ఆస్తి విలువ సుమారు రూ. 3,716.83 కోట్లు. రిలయన్స్ కమ్యూనికేషన్స్ (RCOM) బ్యాంకు మోసాలు, నిధుల మళ్లింపు ఆరోపణలపై ఈ చర్యలు తీసుకున్నట్లు సమాచారం.
ముంబైలోని పాలి హిల్ ప్రాంతంలో ఉన్న 17 అంతస్తుల 'అబోడ్' భవనం, అత్యాధునిక సౌకర్యాలతో పాటు హెలిప్యాడ్, స్విమ్మింగ్ పూల్ వంటివి కలిగి ఉంది. ఈ జప్తునకు RCOM సంస్థ చేసిన బ్యాంకు మోసాలు, వేల కోట్ల రుణాలను దారి మళ్లించారనే ఆరోపణలు కారణమని తెలుస్తోంది.
అనిల్ అంబానీ తన ఆస్తులను 'రైజ్ ట్రస్ట్' పేరుతో నిర్వహించడం ద్వారా వ్యక్తిగత బాధ్యత నుండి తప్పించుకోవడానికి ప్రయత్నించారని, కంపెనీ నిధులను వ్యక్తిగత ఆస్తుల కోసం ఉపయోగించారని ఈడీ ఆరోపిస్తోంది. ఈ ఆరోపణలపై దర్యాప్తు ముమ్మరంగా సాగుతోంది.
ప్రస్తుతం ఈ జప్తు తాత్కాలికం. దీని ప్రకారం, ఆస్తిని అమ్మడం లేదా బదలాయించడం సాధ్యం కాదు. సుప్రీంకోర్టు ఆదేశాల మేరకు ప్రత్యేక దర్యాప్తు బృందం (SIT) ఈ కేసును విచారిస్తోంది. అనిల్ అంబానీ ఈడీ విచారణకు హాజరయ్యారు. ఇప్పటివరకు రిలయన్స్ గ్రూపునకు చెందిన సుమారు రూ. 15,700 కోట్ల విలువైన ఆస్తులను ఈడీ అటాచ్ చేసింది. ఈ జప్తు చట్టబద్ధతను PMLA అథారిటీ 180 రోజుల్లోపు ధృవీకరించాల్సి ఉంటుంది.