టీటీడీ గోశాలల అభివృద్ధికి అంతర్జాతీయ ప్రమాణాలు: అదనపు ఈవో వెంకయ్య చౌదరి

ఈ సమావేశంలో గోశాలలు, జంతు సంరక్షణ కేంద్రాల అభివృద్ధి, మౌలిక వసతుల మెరుగుదలపై చర్చించారు. ప్రస్తుత సౌకర్యాలను ఆధునీకరించడంతో పాటు జంతువులకు మరింత సురక్షితమైన, పరిశుభ్రమైన వాతావరణం కల్పించాలని అదనపు ఈవో సూచించారు.

గోశాలల అభివృద్ధిలో భాగంగా గోడలకు టైల్స్ ఏర్పాటు, స్టీల్ నిర్మాణాలకు పెయింటింగ్, పక్షులు, ఇతర జంతువులు ప్రవేశించకుండా జీఐ మెష్ ఏర్పాటు, కొత్త స్టెయిన్లెస్ స్టీల్ గేట్ల ఏర్పాటు, గోడల మరమ్మతులు, పెయింటింగ్ వంటి పనులకు సమగ్ర ప్రణాళిక రూపొందించినట్లు వంతారా ప్రతినిధులు పవర్ పాయింట్ ప్రజెంటేషన్ ద్వారా వివరించారు.

పశువుల కదలికలకు అనుగుణంగా స్తంభాల మధ్య దూరం, తగినంత గాలి ప్రసరణ, మేత, నీటి వసతులు, సరైన డ్రైనేజీ వ్యవస్థ, గోశాలల పరిసరాల్లో మొక్కలు నాటి ఆహ్లాదకర వాతావరణం కల్పించడం వంటి అంశాలను తెలిపారు.

పాల ఉత్పత్తి ప్రణాళిక

స్వామివారి కైంకర్యాలకు అవసరమైన పాల ఉత్పత్తులను సాధ్యమైనంత వరకు తిరుమలలోనే ఉత్పత్తి చేసేలా ప్రణాళిక రూపొందించాలని అదనపు ఈవో సూచించారు.

ఈ సమావేశంలో జేఈవో గోపీనాథ్, గోశాల డైరెక్టర్ శివ కుమార్ తదితరులు పాల్గొన్నారు.