తెలంగాణలో కుటుంబాలు ఎక్కువ కేలరీలు తీసుకుంటున్నప్పటికీ, శరీరానికి అవసరమైన పోషకాలు అందకపోవడం ఆందోళన కలిగిస్తోంది. పూర్తి స్థాయిలో భోజనం చేస్తున్నా, విటమిన్లు, ఖనిజ లవణాలు, పీచు పదార్థాల లోపం ఏర్పడటాన్ని దాగి ఉన్న ఆకలిగా పిలుస్తారు. ఈ పరిస్థితి పోషకాహార లోపంతో పాటు అధిక బరువు, మధుమేహం, అధిక రక్తపోటు వంటి జీవనశైలి సంబంధిత సమస్యలకు దారితీయవచ్చని ఆరోగ్య నిపుణులు హెచ్చరించారు.
హైదరాబాద్లోని భారత వైద్య పరిశోధనా మండలిజాతీయ పోషకాహార సంస్థ (ఐసీఎంఆర్ఎన్ఐఎన్) విడుదల చేసిన భారతీయుల ఆహార మార్గదర్శకాలు ఈ అంశంపై దృష్టి సారించాయి. ప్యాకెట్లలో లభించే చిరుతిళ్లు, తక్షణమే తినగలిగే ఆహార పదార్థాలు, శుద్ధి చేసిన పిండితో తయారయ్యే బేకరీ ఉత్పత్తుల్లో చక్కెర, ఉప్పు, అనారోగ్యకర కొవ్వులు అధికంగా ఉండే అవకాశం ఉందని సూచించాయి. వీటిలో కృత్రిమంగా విటమిన్లు కలిపినంత మాత్రాన అవి సంపూర్ణ ఆరోగ్యకరమైన ఆహారంగా మారవని స్పష్టం చేశాయి.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
సంప్రదాయ ఆహారమే ఆరోగ్యానికి తోడ్పాటు
తెలంగాణలో తరతరాలుగా వినియోగిస్తున్న జొన్నలు, సజ్జలు, రాగులు వంటి చిరుధాన్యాలు పీచు పదార్థాలు, ఇనుము, కాల్షియం వంటి పోషకాలను అందిస్తాయి. తోటకూర, పాలకూర, గోంగూర, చుక్కకూర వంటి ఆకుకూరలు కూడా శరీరానికి అవసరమైన పోషకాలను అందించడంలో కీలక పాత్ర పోషించాయి. అలాగే పప్పుధాన్యాలు, ఉలవలు, తృణధాన్యాలను ఆహారంలో భాగం చేసుకోవడం ద్వారా శరీరానికి అవసరమైన మాంసకృత్తులను పొందవచ్చు. ఖరీదైన ఆరోగ్య ఆహారాలు, పోషక పదార్థాల పొడులపై మాత్రమే ఆధారపడకుండా స్థానికంగా లభించే సహజ ఆహారాలకు ప్రాధాన్యం ఇవ్వాలని నిపుణులు సూచించారు.
