జ్యోతిష్యపీఠం శంకరాచార్య స్వామి అవిముక్తేశ్వరానంద సరస్వతిపై మైనర్లపై లైంగిక వేధింపులకు పాల్పడ్డారనే ఆరోపణలపై ప్రయాగ్రాజ్లోని పోక్సో (POCSO) కోర్టు ఆదేశాల మేరకు పోలీసులు ఎఫ్ఐఆర్ (FIR) నమోదు చేశారు. ఈ పరిణామం రాష్ట్ర రాజకీయాల్లో, ఆధ్యాత్మిక వర్గాల్లో తీవ్ర కలకలం రేపింది.
అశుతోష్ బ్రహ్మచారి అనే వ్యక్తి దాఖలు చేసిన పిటిషన్పై విచారణ జరిపిన పోక్సో కోర్టు, శంకరాచార్య అవిముక్తేశ్వరానందతో పాటు ఆయన శిష్యుడు ముకుందానంద గిరిపై FIR నమోదు చేయాలని పోలీసులను ఆదేశించింది. ఫిర్యాదుదారుడు తమ వద్ద లైంగిక వేధింపులకు సంబంధించిన డిజిటల్ ఆధారాలు (సీడీలు, పెన్డ్రైవ్లు) ఉన్నాయని కోర్టుకు సమర్పించారు.
శంకరాచార్య అవిముక్తేశ్వరానంద ఈ ఆరోపణలను తీవ్రంగా ఖండించారు. ఇది తన ప్రతిష్ఠను దెబ్బతీయడానికి జరుగుతున్న కుట్ర అని ఆయన పేర్కొన్నారు. ఫిర్యాదుదారు అశుతోష్ ఒక 'హిస్టరీ షీటర్' అని, అతనిపై గతంలో రౌడీషీట్ ఉందని, డబ్బులు వసూలు చేయడమే అతని వృత్తి అని, ఇతర వ్యక్తుల ప్రోద్బలంతోనే ఈ ఆరోపణలు చేస్తున్నారని స్వామి ఆరోపించారు.
గతంలో ముఖ్యమంత్రి యోగి ఆదిత్యనాథ్ నిర్ణయాలను, అయోధ్య రామమందిర ప్రాణప్రతిష్ఠను అవిముక్తేశ్వరానంద బహిరంగంగా విమర్శించిన నేపథ్యంలో ఈ కేసు నమోదు కావడం ప్రాధాన్యత సంతరించుకుంది. పోలీసులు FIR నమోదు చేయడంతో పాటు, సమర్పించిన డిజిటల్ ఆధారాలను ఫోరెన్సిక్ పరీక్షకు పంపే అవకాశం ఉంది. బాధితులైన మైనర్ల నుంచి కూడా స్టేట్మెంట్లు సేకరించనున్నారు.
