కామారెడ్డి, 2026-08-05
కామారెడ్డి జిల్లాలో కురుస్తున్న భారీ వర్షాల నేపథ్యంలో ఎస్పీ రాజేష్ చంద్ర క్షేత్రస్థాయిలో పర్యటించి, వరద ప్రభావిత ప్రాంతాలను పరిశీలించారు. ఈ క్రమంలో వరద నీటిలో చిక్కుకున్న పెళ్లి బస్సులోని 45 మంది ప్రయాణికులను పోలీసులు, అగ్నిమాపక సిబ్బంది సురక్షితంగా బయటకు తరలించారు.
జిల్లాలో కురుస్తున్న భారీ వర్షాల నేపథ్యంలో కామారెడ్డి జిల్లా ఎస్పీ ఎం. రాజేష్ చంద్ర, ఐపీఎస్ మంగళవారం క్షేత్రస్థాయిలో పర్యటించి వరద ప్రభావిత ప్రాంతాలను పరిశీలించారు. కామారెడ్డి పట్టణంలోని పెద్ద చెరువు, గురు రాఘవేంద్ర కాలనీ బ్రిడ్జి ప్రాంతాలను సందర్శించి నీటి ప్రవాహం, భద్రతా ఏర్పాట్లపై అధికారులతో సమీక్ష నిర్వహించారు.
ప్రజలకు ఎస్పీ సూచనలు
ప్రజల ప్రాణ రక్షణే తమ తొలి ప్రాధాన్యత అని ఎస్పీ స్పష్టం చేశారు. వాగులు, కల్వర్టులు, చెరువులు, వరద ప్రవాహ ప్రాంతాల వద్దకు ఎట్టి పరిస్థితుల్లోనూ వెళ్లవద్దని, సెల్ఫీలు, వీడియోల కోసం ప్రాణాలను ప్రమాదంలోకి నెట్టుకోవద్దని హెచ్చరించారు. చిన్నారులపై తల్లిదండ్రులు ప్రత్యేక నిఘా ఉంచాలని, అత్యవసరమైతే తప్ప ఇళ్ల నుంచి బయటకు రావద్దని సూచించారు.
బందోబస్తు పెంపుపై ఆదేశాలు
జిల్లాలోని వరద ప్రభావిత ప్రాంతాలు, చెరువులు, రద్దీ కూడళ్ల వద్ద పోలీసు బందోబస్తును మరింత బలోపేతం చేయాలని అధికారులను ఆదేశించిన ఎస్పీ, అన్ని పోలీసు అధికారులు క్షేత్రస్థాయిలోనే అందుబాటులో ఉంటూ పరిస్థితిని నిరంతరం పర్యవేక్షించాలని సూచించారు.
