అప్పుల బాధతో రైతు ఆత్మహత్య.. ఆదిలాబాద్ జిల్లాలో విషాదం

అప్పుల భారాన్ని తీర్చలేక ఓ రైతు ఆత్మహత్య చేసుకున్న విషాద ఘటన ఆదిలాబాద్ జిల్లాలో చోటుచేసుకుంది. మండల కేంద్రానికి చెందిన కాడే లస్మన్న (65) తనకున్న మూడు ఎకరాల భూమిలో పత్తి సాగు కోసం ప్రైవేట్గా రూ.4 లక్షలు, మహారాష్ట్ర బ్యాంకులో రూ.1.5 లక్షలు అప్పుగా తీసుకున్నారు.

పంట సాగు కోసం తీసుకున్న అప్పులు తీర్చలేననే ఆందోళనతో లస్మన్న తీవ్ర మనస్తాపానికి గురైనట్లు సమాచారం. ఈ క్రమంలో సోమవారం తన వ్యవసాయ భూమిలో ఆత్మహత్యకు పాల్పడ్డారు. విషయం తెలుసుకున్న కుటుంబ సభ్యులు, స్థానికులు పోలీసులకు సమాచారం అందించారు.

లస్మన్నకు ముగ్గురు కుమార్తెలు, ఒక కుమారుడు ఉన్నారు. ఆయన భార్య నాగమ్మ ఇచ్చిన ఫిర్యాదు ఆధారంగా పోలీసులు కేసు నమోదు చేసి దర్యాప్తు చేపట్టారు.