కడపచెన్నై జాతీయ రహదారిపై భాకరాపేట సమీపంలో గురువారం ఉదయం ఆర్టీసీ బస్సు పాడి పశువులను ఢీకొన్న ఘటనలో మూడు గేదెలు అక్కడికక్కడే మృతి చెందాయి. మరో గేదె తీవ్రంగా గాయపడింది. ఈ ప్రమాదంలో రైతు తుర్ర శ్రీనివాసులుకు సుమారు రూ.4 లక్షల నష్టం వాటిల్లింది.
మండలం భాకరాపేట గ్రామానికి చెందిన పాడి రైతు తుర్ర శ్రీనివాసులు తన గేదెలను రోడ్డుపై తోలుకొని వెళ్తుండగా, ప్రొద్దుటూరు నుంచి తిరుపతి వైపు వెళ్తున్న ఆర్టీసీ బస్సు (ఏపీ 04 జెడ్ 0358) వేగంగా వచ్చి వాటిని ఢీకొట్టింది. ఈ ఘటనలో మూడు గేదెలు అక్కడికక్కడే మృతి చెందగా, మరో గేదె తీవ్ర గాయాలతో ప్రాణాపాయ స్థితిలో ఉంది.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
బస్సు పశువులను ఢీకొన్న అనంతరం ఆపకుండా వెళ్లిపోయిందని రైతు శ్రీనివాసులు ఆరోపించారు. తమ కుటుంబ జీవనాధారం పూర్తిగా పాడి పశువులపైనే ఆధారపడి ఉందని, ఈ ప్రమాదం కారణంగా తీవ్రంగా నష్టపోయామని ఆయన ఆవేదన వ్యక్తం చేశారు. మృతి చెందిన మూడు గేదెలతో పాటు గాయపడిన మరో గేదె కలిపి సుమారు రూ.4 లక్షల వరకు నష్టం వాటిల్లిందని తెలిపారు.
