ఆదాయానికి మించిన ఆస్తుల కేసులో అరెస్టయిన డీఎస్పీ భీమ్రెడ్డి వ్యవహారంలో తెలంగాణ అవినీతి నిరోధక శాఖ (ఏసీబీ) దర్యాప్తును మరింత ముమ్మరం చేసింది. ఆయనకు సంబంధించినట్లు అనుమానిస్తున్న 8 మంది బినామీలను ఏసీబీ అధికారులు గుర్తించారు. వీరి నివాసాలు, ఆస్తులపై అధికారులు సోదాలు నిర్వహించారు.
ఇప్పటికే భీమ్రెడ్డికి సంబంధించిన పలు ప్రాంతాల్లో జరిపిన సోదాల్లో భారీగా ఆస్తులు, నగదు, బంగారం, వెండి, భూములకు సంబంధించిన పత్రాలు బయటపడ్డాయని ఏసీబీ తెలిపింది. తెలంగాణతో పాటు కర్ణాటకలోనూ ఆస్తులు ఉన్నట్లు దర్యాప్తులో గుర్తించారు. వీటి మార్కెట్ విలువ రూ.150 కోట్లకు పైగా ఉండొచ్చని ఏసీబీ అంచనా వేసినట్లు తాజా నివేదిక పేర్కొంది.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
అంతకుముందు జరిగిన సోదాల్లో భీమ్రెడ్డి నివాసం సహా 16 ప్రాంతాల్లో తనిఖీలు చేపట్టారు. ఈ సందర్భంగా నగదు, సుమారు 2 కిలోల బంగారు ఆభరణాలు, 20 కిలోల వెండి వస్తువులు, బ్యాంకు డిపాజిట్లు, విల్లాలు, ఫ్లాట్లు, వాణిజ్య స్థలాలు, వ్యవసాయ భూములకు సంబంధించిన పత్రాలను అధికారులు గుర్తించారు. ఒక బినామీగా అనుమానిస్తున్న వ్యక్తి ఇంట్లో సుమారు రూ.40 లక్షల నగదును కూడా స్వాధీనం చేసుకున్నట్లు ఏసీబీ వెల్లడించింది.
