అన్నమయ్య జిల్లాలో జరుగుతున్న ఎంపీటీసీ, జెడ్పీటీసీ ఎన్నికల్లో నామినేషన్లు వేయకుండా ఎవరైనా అడ్డుకుంటే వెంటనే అధికారులకు ఫిర్యాదు చేయాలని జిల్లా కలెక్టర్, జిల్లా ఎన్నికల అధికారి నిశాంత్ కుమార్ స్పష్టం చేశారు. రాష్ట్ర ఎన్నికల సంఘం మార్గదర్శకాల ప్రకారం, నామినేషన్ ప్రక్రియలో అడ్డంకులు ఎదుర్కొన్న వారికి సాయంత్రం 5 గంటలలోపు నామినేషన్ దాఖలు చేసేందుకు చర్యలు తీసుకోవాలని ఆదేశించారు.
అన్నమయ్య జిల్లాలో జరుగుతున్న రెండో సాధారణ ఎంపీటీసీ, జెడ్పీటీసీ ఎన్నికల్లో ఎవరైనా నామినేషన్లు వేయకుండా అడ్డుకుంటే వెంటనే సంబంధిత అధికారుల దృష్టికి జిల్లా కలెక్టర్, జిల్లా ఎన్నికల అధికారి నిశాంత్ కుమార్ స్పష్టం చేశారు. ఈ మేరకు ఆయన శుక్రవారం ఒక ప్రకటన విడుదల చేశారు. రాష్ట్ర ఎన్నికల సంఘం జారీ చేసిన ఆదేశాల ప్రకారం, నామినేషన్ ప్రక్రియలో అడ్డంకులు ఎదుర్కొన్నట్లు ఫిర్యాదులు అందితే అధికారులు తక్షణమే స్పందించాలని ఆదేశించారు. ఫిర్యాదుదారులను ఫోన్ ద్వారా సంప్రదించి, నిర్దేశిత గడువు సాయంత్రం 5:00 గంటలలోపు వారు నిరభ్యంతరంగా నామినేషన్ దాఖలు చేసేందుకు పూర్తి సహకారం అందించాలని స్పష్టం చేశారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
రిటర్నింగ్ అధికారులు ఎన్నికల నిబంధనలు, విధివిధానాలకు లోబడి అటువంటి అభ్యర్థుల నామినేషన్లను స్వీకరించాలని ఆదేశించారు. క్షేత్రస్థాయిలో సమస్యలు ఎదుర్కొంటున్న ఫిర్యాదుదారులకు అవసరమైన పక్షంలో పోలీస్ శాఖ ద్వారా తగిన వ్యక్తిగత భద్రత కల్పించి, నామినేషన్ కేంద్రాలకు చేర్చి ప్రశాంత వాతావరణంలో నామినేషన్లు వేసేలా చర్యలు తీసుకోవాలని తెలిపారు. నిజంగా ఇబ్బందులు, అడ్డంకులు ఎదుర్కొన్న వారు మాత్రమే అధికారులను ఆశ్రయించాలని, వచ్చిన ఫిర్యాదులను రికార్డుల్లో భద్రపరిచి తదుపరి చర్యలు చేపట్టాలని అధికారులను ఆదేశించారు. పోలీసు శాఖతో సమన్వయం చేసుకుంటూ ఎన్నికల సంఘం నిబంధనలను పక్కాగా అమలు చేయాలని కలెక్టర్ స్పష్టం చేశారు.
