నకిలీ విద్యార్హత ధ్రువపత్రాలు సమర్పించి ప్రభుత్వ ఉద్యోగాలు పొందినట్లు తేలిన 35 మంది ప్రభుత్వ జూనియర్ లెక్చరర్ల నియామకాలను తెలంగాణ ఇంటర్మీడియట్ విద్యాశాఖ రద్దు చేసింది. గతంలో కాంట్రాక్ట్ పద్ధతిలో పనిచేసి, 2023లో క్రమబద్ధీకరించబడిన వీరి సర్టిఫికెట్లపై వచ్చిన ఫిర్యాదులతో ఈ చర్యలు తీసుకున్నారు.
కాంట్రాక్ట్ జూనియర్ లెక్చరర్ల సేవలను క్రమబద్ధీకరించే సమయంలో సమర్పించిన విద్యార్హత ధ్రువపత్రాలపై అనుమానాలు రావడంతో ఇంటర్మీడియట్ విద్యాశాఖ దాదాపు 360 మంది జూనియర్ లెక్చరర్ల సర్టిఫికెట్లను సంబంధిత విశ్వవిద్యాలయాలకు పంపి ధ్రువీకరణ చేపట్టింది. ఈ పరిశీలనలో కొందరు లెక్చరర్లు సమర్పించిన పీజీ, బీటెక్ తదితర విద్యార్హత ధ్రువపత్రాలు ఆయా విశ్వవిద్యాలయాలు జారీ చేసినవి కావని నిర్ధారణ అయింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ వ్యవహారంలో సంబంధిత లెక్చరర్లకు అధికారులు కారణం చూపాలని నోటీసులు జారీ చేశారు. తమపై ఎందుకు చర్యలు తీసుకోకూడదో వివరణ ఇవ్వాలని ఆదేశించారు. వచ్చిన వివరణలను పరిశీలించిన అనంతరం, ధ్రువపత్రాల అసలుదనంపై సంబంధిత విశ్వవిద్యాలయాల నుంచి వచ్చిన నిర్ధారణలను పరిగణనలోకి తీసుకుని 35 మంది నియామకాలను రద్దు చేసినట్లు సమాచారం.
