తాగునీరు, విద్యుత్ సరఫరాపై కాంగ్రెస్ సర్కార్ దృష్టి: అధికారులకు ఆదేశాలు

విద్యుత్ను ఎంత ఖర్చు పెట్టి అయినా కొనడానికి సిద్ధంగా ఉన్నామని, కానీ మార్కెట్లో అందుబాటులో లేదని అధికారులు తెలిపారు. బ్యాంకుల్లో అప్పులు తెచ్చి విద్యుత్ కొనడానికి ప్రయత్నించినా దొరకడం లేదని పేర్కొన్నారు. అవసరం లేకుండా విద్యుత్ వాడొద్దని, సోలార్ విద్యుత్ ఉత్పత్తిని పెంచుకోవాలని సూచించారు. కొండారెడ్డిపల్లిలో గ్రామస్తులు సోలార్ విద్యుత్ను అమ్మడం ద్వారా లబ్ధి పొందారని, మహిళా సంఘాలను ఇందులో భాగస్వామ్యం చేయాలని సూచించారు.

కేసీఆర్, ఆయన కుటుంబ సభ్యులు, జగదీశ్ రెడ్డిని దామరచర్ల దగ్గర గుంజబాతి కొట్టినా తప్పులేదని, కేసీఆర్కు అన్నీ ఉన్నా మతి పనిచేయడం లేదని విమర్శించారు. రా మెటీరియల్ ఉన్న దగ్గరే ప్రాజెక్టులు ఏర్పాటు చేస్తారని, నాలుగు రూపాయల నుంచి ఐదు రూపాయల లోపే సింగరేణి ప్రాంతంలోని విద్యుత్ ప్రాజెక్టుల నుంచి విద్యుత్ లభిస్తోందని తెలిపారు. 4 వేల మెగావాట్ల యాదాద్రి పవర్ ప్లాంట్కు రూ.8 వేల కోట్లు అదనంగా ఖర్చు అయిందని, యూనిట్ విద్యుత్ ఉత్పత్తి ఖర్చు రూ.6కు పైగా పెరిగిందని పేర్కొన్నారు.

సింగరేణిలో లభ్యం కాని జీ-9 బొగ్గుతో యాదాద్రిలో విద్యుత్ ఉత్పత్తి చేస్తామని చెప్పారని, విదేశాల నుంచి కృష్ణపట్నం పోర్టు ద్వారా బొగ్గును దిగుమతి చేసుకుని యాదాద్రిలో విద్యుత్ ఉత్పత్తి చేయాలని చూశారని తెలిపారు. రామగుండం, కొత్తగూడెం, మంచిర్యాల లాంటి ప్రాంతాల్లో యాదాద్రిని నిర్మిస్తే రూ.28 వేల కోట్లతో 2019 నాటికి పూర్తి అయ్యేదని, ప్రతి ఏడాది రూ.2 వేల కోట్ల బొగ్గు రవాణా భారం తగ్గేదని పేర్కొన్నారు. యాదాద్రిని దామరచర్లలో కట్టడం వల్ల 10 ఏళ్లు ఆలస్యం అయిందని తెలిపారు.

నైని ప్రాంతానికి డిప్యూటీ సీఎం భట్టి విక్రమార్క వెళ్లి స్థానికులతో మాట్లాడి బొగ్గు తీసుకువస్తున్నామని, కేంద్ర మంత్రి కిషన్ రెడ్డితో మాట్లాడి మహానది కోల్ఫీల్డ్స్ నుంచి యాదాద్రికి బొగ్గు తీసుకువస్తున్నామని తెలిపారు. యాదాద్రిలో ఒక్కొక్క యూనిట్ను పట్టాలెక్కిస్తున్నామని చెప్పారు. నోరు తెరిస్తే బీఆర్ఎస్ నాయకులు అబద్ధాలు చెబుతున్నారని విమర్శించారు. జీ-9 బొగ్గు అందుబాటులో లేకపోవడం వల్ల ఇతర రకాల బొగ్గును తీసుకువచ్చి యాదాద్రిలో విద్యుత్ ఉత్పత్తి చేస్తున్నామని తెలిపారు.

ప్రతిమా శ్రీనివాసరావు తెర వెనుక ఉన్నారని, ఆయనకు యాభై ఏళ్లలో లక్ష కోట్ల లాభం వచ్చేలా కేసీఆర్ ప్రయత్నం చేశారని ఆరోపించారు. కృష్ణపట్నం, మచిలీపట్నం పోర్టులు మిర్యాలగూడకు దగ్గరగా ఉంటాయన్న ఉద్దేశంతోనే యాదాద్రిని అక్కడ నిర్మించారని, లక్ష కోట్ల అవినీతికి కేసీఆర్ డిజైన్ చేశారని విమర్శించారు. నీళ్లు, ఇసుక, బొగ్గు, డ్రగ్స్, గంజాయి, పాలు.. ఇలా ఏదీ వదలలేదని ఆరోపించారు.

నీళ్లు, నిధులు, నియామకాలు అన్నీ కేసీఆర్ కుటుంబానికే పోయాయని, నేను, నా కుటుంబం అన్నట్లుగా వాళ్ల తీరు ఉందని విమర్శించారు. నీళ్లు ఫామ్హౌస్కు, నిధులు బీఆర్ఎస్ ఖాతాకు వెళ్లాయని, బీఆర్ఎస్ ఖాతాల్లో రూ.1,500 కోట్లు ఉన్నాయని తెలిపారు. ఎన్ని ఏళ్లు అధికారంలో ఉన్నా కాంగ్రెస్ పార్టీ నిధుల కోసం ప్రతి నెలా వెతుక్కుంటోందని పేర్కొన్నారు.

సింగరేణిలో ఒక్క టెండర్ కూడా వేయకుండా బీఆర్ఎస్ ప్రభుత్వం అడ్డుకుందని, అసెంబ్లీలో ఎదురుగా కూర్చోబెట్టి చెప్పాలని అనుకున్నానని తెలిపారు. భూముల విషయం బయటపెడితే తేలు కుట్టిన దొంగల్లా ఉండిపోయారని విమర్శించారు. పాలు కూడా వదలలేదని, ప్రైవేట్ ఆస్పత్రులు, విద్యాసంస్థలకు హరీశ్ రావు పాలు అమ్మారని ఆరోపించారు. సంతోష్ రావుకు టానిక్ ద్వారా విదేశాల నుంచి నేరుగా మద్యం దిగుమతి చేసుకుని అమ్ముకునే అవకాశం ఉందని తెలిపారు. మనం మౌనంగా ఉంటే అర్థాంగీకారంగా భావిస్తున్నారని పేర్కొన్నారు.

విద్యుత్ విషయంలో ప్రభుత్వం అద్భుతంగా పనిచేసిందని, రైతులకు విద్యుత్ ఇవ్వడంలో అద్భుతమైన విజయం సాధించామని తెలిపారు. మోదీ ఎన్ని పేర్లు మార్చినా అది ఎప్పటికీ మహాత్మా గాంధీ ఉపాధి హామీ పథకమేనని పేర్కొన్నారు. సంక్రాంతి తర్వాత మే వరకు నాలుగు నెలల పాటు ప్రత్యేక పథకాన్ని తీసుకువస్తామని, కేంద్ర ప్రభుత్వం నుంచి వచ్చే నిధులతో పాటు రాష్ట్ర ప్రభుత్వం కూడా పెద్ద ఎత్తున ఈ పథకం కోసం ఖర్చు పెట్టబోతోందని తెలిపారు.

ప్రతి ప్రజాప్రతినిధి గ్రామాలకు వెళ్లాల్సిందేనని, అందరి ఫోన్లలో ప్రత్యేక యాప్ పెట్టి పర్యవేక్షణ చేస్తామని తెలిపారు. వ్యవసాయ పొలాలకు వెళ్లే దారులు, కాలువలు, చెరువులు, కుంటలను పునరుద్ధరించుకోవడానికి ఈ కార్యక్రమాన్ని వినియోగించుకోవాలని సూచించారు. ప్రతి మనిషికి పని కల్పించాలని, ప్రతి ఒక్కరికీ అన్నం పెట్టాలని అన్నారు. పకడ్బందీగా ఈ పథకాన్ని రూపొందించి అమలు చేయాలని, రైతులను ఉత్తేజపరచడానికి కళాజాతాలను సిద్ధం చేయాలని సూచించారు.

గాంధీభవన్లో ఎంపీ చామల కిరణ్ నేతృత్వంలో హెల్ప్ డెస్క్ ఏర్పాటు చేయాలని, ప్రజలను భాగస్వామ్యం చేయాల్సిందేనని, ప్రజలను కప్పిపుచ్చవద్దని సూచించారు. హరీశ్ రావు అసూయ, ద్వేషంతో ఏ మాటలు మాట్లాడినా పట్టించుకోవద్దని, కర్ణాటక, తమిళనాడుకు హరీశ్ రావు వెళ్లి కరువు రావాలని క్షుద్రపూజలు చేశారని అద్దంకి దయాకర్ గతంలో చెప్పారని గుర్తుచేశారు. కరువు రావాలని క్షుద్రపూజలు చేసినవారి మాటలను నమ్మవద్దని సూచించారు. చేతినిండా పని, కడుపునిండా భోజనం.. ఇదే మన కార్యాచరణ అని తెలిపారు.

విద్యుత్ ఇచ్చిన బోర్లలో నీళ్లు లేవని, పెట్టుబడి కూడా పోతుందని, వచ్చే వానాకాలంలో బ్రహ్మాండమైన పంటలు పండించుకోవచ్చని తెలిపారు. పట్టభద్రుల ఎమ్మెల్సీ ఎన్నికలపై అందరూ అప్రమత్తంగా ఉండాలని, పట్టభద్రుల ఎన్నికల్లో ప్రతిసారీ ఓటు హక్కును నమోదు చేసుకోవాల్సి ఉంటుందని తెలిపారు. మహబూబ్నగర్, రంగారెడ్డి, హైదరాబాద్ నియోజకవర్గాల్లో గతంతో పోల్చితే ఇప్పటివరకు 36 శాతం ఓట్లు మాత్రమే నమోదయ్యాయని, ఇంకా 64 శాతం ఓట్లు నమోదు కావాలని పేర్కొన్నారు.

ప్రతి హక్కు ఉన్న ఓటరు నమోదయ్యేలా చూడాలని, ప్రతి ఒక్కరినీ కలవాలని సూచించారు. అభ్యర్థుల ఎంపికపై పార్టీ నిర్ణయమే ఫైనల్ అని, యువకులు సామా రామ్మోహన్ రెడ్డి, రాంరెడ్డి సర్వోత్తమ్ రెడ్డిని పార్టీ ఎంపిక చేసిందని, వచ్చే 30 ఏళ్ల పాటు పార్టీ కోసం పనిచేస్తారని తెలిపారు. బెస్ట్ క్యాండిడేట్స్ను పార్టీ ఎంపిక చేసిందని, అందరం కలిసి గెలిపించుకోవాలని పిలుపునిచ్చారు.

బీఆర్ఎస్, బీజేపీ దొంగదెబ్బ తీయాలని ప్రయత్నిస్తున్నాయని, వెనుక అలాయ్ బలాయ్ చేసుకుంటున్నాయని విమర్శించారు. సర్పంచ్ల్లో 66 శాతం పార్టీ పేరు మీద గెలిచామని, మున్సిపల్ ఎన్నికల్లో 85 శాతంతో పార్టీ సింబల్పై గెలిచామని తెలిపారు. ప్రతి ఎన్నికలో కార్యకర్తలు, నాయకులు ప్రత్యేక దృష్టి సారించడంతో గెలిచామని, ఎమ్మెల్సీ ఎన్నికలు అభ్యర్థులకు మాత్రమే సంబంధించినవి కావు, పార్టీకి కూడా సంబంధించినవని, గెలిపించి తీరాలని పిలుపునిచ్చారు. ఎన్నికలు జిల్లాలకు చెందిన నాయకులకు బాధ్యతలు అప్పగించాలని సూచించారు.