తెలంగాణలో వ్యవసాయానికి రోజుకు కనీసం 12 గంటల నిరంతర విద్యుత్ సరఫరా చేయడంలో కాంగ్రెస్ ప్రభుత్వం విఫలమైందని మాజీ మంత్రి, బీఆర్ఎస్ నేత జోగు రామన్న ఆరోపించారు. ఆదివారం జిల్లా విద్యుత్ అధికారి జాదవ్ సుభాష్ను కలిసి, రైతుల విద్యుత్ సమస్యలపై వినతిపత్రం సమర్పించారు. వ్యవసాయ అవసరాలకు తగిన విద్యుత్ సరఫరా అందేలా చర్యలు తీసుకోవాలని అధికారులను కోరారు.
వ్యవసాయ రంగానికి అనధికారిక విద్యుత్ కోతలు విధిస్తున్నారని, దీనివల్ల రైతులు తీవ్ర ఇబ్బందులు ఎదుర్కొంటున్నారని జోగు రామన్న పేర్కొన్నారు. విద్యుత్ సరఫరాలో తరచూ అంతరాయాలు ఏర్పడటంతో పంటలకు సాగునీరు అందించడంలో సమస్యలు తలెత్తుతున్నాయని, పంటలు ఎండిపోయే పరిస్థితి ఏర్పడుతోందని ఆయన అన్నారు. అవసరమైన విద్యుత్ ట్రాన్స్ఫార్మర్లను ఏర్పాటు చేయడంలోనూ ప్రభుత్వం నిర్లక్ష్యం వహిస్తోందని ఆయన ఆరోపించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
గత బీఆర్ఎస్ ప్రభుత్వ హయాంలో వ్యవసాయానికి 24 గంటల విద్యుత్ సరఫరా చేశామని జోగు రామన్న పేర్కొన్నారు. వ్యవసాయ విద్యుత్ కనెక్షన్లకు మీటర్లు ఏర్పాటు చేయడాన్ని అప్పట్లో తమ ప్రభుత్వం వ్యతిరేకించిందని తెలిపారు. ప్రస్తుతం విద్యుత్ వినియోగానికి సంబంధించిన గణాంకాలను తప్పుగా చూపించేందుకు అధికారులు ప్రభుత్వ ఒత్తిడికి గురవుతున్నారని కూడా ఆయన ఆరోపించారు.
