ప్రధానమంత్రి మత్స్య సంపద యోజన (PMMSY) కింద కాకినాడ ఫిషింగ్ హార్బర్ను అత్యాధునిక, స్మార్ట్ సదుపాయంగా అభివృద్ధి చేయడానికి కేంద్ర ప్రభుత్వం రూ. 72 కోట్లు మంజూరు చేసిందని కేంద్ర మత్స్య, పశుసంవర్ధక శాఖ మంత్రి రాజీవ్ రంజన్ సింగ్ శుక్రవారం ప్రకటించారు. విశాఖపట్నంలో జరిగిన ‘సీఫుడ్ ఎగుమతుల జాతీయ వర్క్షాప్’ అనంతరం ఆయన ఈ వివరాలు వెల్లడించారు.
కేంద్ర మంత్రి రాజీవ్ రంజన్ సింగ్ మాట్లాడుతూ, కాకినాడ హార్బర్ పురాతనమైనదని, దానిని ఆధునికీకరించి, ల్యాండింగ్ సదుపాయాలను మెరుగుపరచడం ద్వారా మత్స్య ఎగుమతులను ప్రోత్సహించడానికి ఈ నిధులు కేటాయించినట్లు తెలిపారు. ఈ ప్రాజెక్టుతో మత్స్యకారుల జీవనోపాధి మెరుగుపడుతుందని భావిస్తున్నారు.
అదనంగా, ఆంధ్రప్రదేశ్ ప్రభుత్వం స్థలం కేటాయిస్తే కాకినాడలో ‘నేషనల్ ఫిషరీస్ డెవలప్మెంట్ బోర్డ్’ (NFDB) ప్రాంతీయ కార్యాలయాన్ని ఏర్పాటు చేయడానికి తమ మంత్రిత్వ శాఖ సిద్ధంగా ఉందని మంత్రి పేర్కొన్నారు. దీనిపై ముఖ్యమంత్రి నారా చంద్రబాబు నాయుడు సానుకూలంగా స్పందిస్తూ, భూమి కేటాయింపునకు హామీ ఇచ్చారని తెలిపారు.
గత దశాబ్ద కాలంలో దేశీయ మత్స్య ఉత్పత్తి గణనీయంగా పెరిగిందని, 106 శాతం వృద్ధి సాధించి 197.7 లక్షల టన్నులకు చేరిందని మంత్రి తెలిపారు. అదేవిధంగా, సముద్ర ఉత్పత్తుల ఎగుమతులు కూడా రూ.30,213 కోట్ల నుంచి రూ.62,408 కోట్లకు పెరిగాయని ఆయన వివరించారు.
ప్రతికూల పరిస్థితులను అధిగమించి, గత ఆర్థిక సంవత్సరంలో సముద్ర ఉత్పత్తుల ఎగుమతులు రూ.73,000 కోట్లకు చేరాయని, ఇది మునుపటి సంవత్సరంతో పోలిస్తే రూ.11,000 కోట్ల వృద్ధి అని మంత్రి పేర్కొన్నారు. అంతర్దేశీయ మత్స్య రంగం నుంచి ఎగుమతులను ప్రోత్సహించేలా ఒక ప్రామాణిక ఎస్ఓపీని రూపొందించాలని అధికారులను ఆదేశించారు.
