7 నెలల చిన్నారి హత్యాయత్నం: కన్నతండ్రి, సవతి తల్లి అరెస్ట్

బీర్కూర్‌కు చెందిన సంకు సంధ్య తన అక్క శైలజ భర్త టేకు సతీష్‌ను రెండో వివాహం చేసుకుంది. వీరికి వైష్ణవి అనే కుమార్తె జన్మించింది. అనంతరం దాంపత్య విభేదాల కారణంగా విడిపోయిన ఇద్దరూ, చిన్నారిని తండ్రి వద్దే ఉంచాలని పెద్దల సమక్షంలో నిర్ణయించారు. అయితే చిన్నారిని పోషించడం భారంగా మారిందనే భావనతో పాటు కుటుంబ విభేదాల నేపథ్యంలో చిన్నారిని అడ్డు తొలగించుకోవాలని సతీష్, శైలజ కుట్ర పన్నినట్లు దర్యాప్తులో తేలింది.

జూలై 14 అర్ధరాత్రి ఇంటి బయట నిద్రిస్తున్న చిన్నారి వైష్ణవిని ఇద్దరూ తీసుకెళ్లి సీసీ రోడ్డుపై ఈడ్చుకుంటూ కొంతదూరం తీసుకెళ్లారు. అనంతరం గడ్డి ఉన్న ప్రదేశంలో పడుకోబెట్టి వెంట తీసుకెళ్లిన బ్లేడ్లతో చిన్నారి శరీరంపై పలుచోట్ల గాయాలు చేశారు. చిన్నారి ఏడుపు ఆగిపోవడంతో చనిపోయిందని భావించి అక్కడే వదిలేసి ఇంటికి వెళ్లిపోయినట్లు విచారణలో వెల్లడైంది.

మరుసటి రోజు ఉదయం చిన్నారి కనిపించడం లేదని గ్రామస్తులకు సమాచారం ఇచ్చి వారితో కలిసి వెతుకుతున్నట్లు నాటకమాడారు. చిన్నారి ఉన్న ప్రదేశం ముందుగానే తెలిసినా, అక్కడే కనిపించినట్లు చూపించి ఆసుపత్రికి తరలించారు. రాత్రి సమయంలో కుక్కలు ఎత్తుకెళ్లి గాయపరిచినట్లు బంధువులు, గ్రామస్తులు, పోలీసులను నమ్మించే ప్రయత్నం చేశారు.

చిన్నారి తల్లి సంధ్య ఫిర్యాదుతో కేసు నమోదు చేసిన పోలీసులు జిల్లా ఎస్పీ ఎం. రాజేష్ చంద్ర, ఐపీఎస్ ఆదేశాల మేరకు ప్రత్యేక బృందాన్ని ఏర్పాటు చేశారు. బాన్సువాడ డీఎస్పీ విఠల్‌రెడ్డి పర్యవేక్షణలో రూరల్ సీఐ తిరుపయ్య, బీర్కూర్ ఎస్‌ఐ రాములు, పిట్లం ఎస్‌ఐ ఆంజనేయులు ఆధ్వర్యంలో సాంకేతిక ఆధారాలు, సాక్షుల వాంగ్మూలాలు, శాస్త్రీయ పరిశీలన ఆధారంగా దర్యాప్తు చేపట్టగా అసలు కుట్ర వెలుగులోకి వచ్చింది. విచారణలో నిందితులు తమ నేరాన్ని ఒప్పుకున్నట్లు పోలీసులు తెలిపారు.

ఈ కేసులో చిన్నారి తండ్రి టేకు సతీష్, సవతి తల్లి సంకు శైలజలను అరెస్ట్ చేశారు. వారి వద్ద నుంచి ఒక రెడ్‌మీ క్రీమ్ కలర్ స్మార్ట్‌ఫోన్, ఒక కార్బన్ కీప్యాడ్ మొబైల్ ఫోన్ను స్వాధీనం చేసుకున్నారు.

సంచలన కేసును అత్యంత వేగంగా, శాస్త్రీయంగా ఛేదించిన బాన్సువాడ రూరల్ సీఐ తిరుపయ్య, బీర్కూర్ ఎస్‌ఐ రాములు, పిట్లం ఎస్‌ఐ ఆంజనేయులు, దర్యాప్తులో పాల్గొన్న పోలీసు సిబ్బందిని జిల్లా ఎస్పీ ఎం. రాజేష్ చంద్ర, ఐపీఎస్ అభినందించినట్లు డీఎస్పీ విఠల్‌రెడ్డి తెలిపారు.