రూ.2 కోట్ల విలువైన 109 ఎర్రచందనం దుంగలు స్వాధీనం: ముగ్గురు స్మగ్లర్లు…

ఈ క్రమంలో, 2026 జూన్ 24 సాయంత్రం విశ్వసనీయ సమాచారంతో అనంతపురం జిల్లా నార్పల మండలం బొందలవాడ గ్రామ పరిసరాల్లో టాస్క్ ఫోర్స్ సిబ్బంది, అటవీ శాఖ అధికారులు ప్రత్యేక తనిఖీలు నిర్వహించారు. ఈ ఆపరేషన్‌లో అనంతపురం జిల్లాకు చెందిన నల్లాని నందకుమార్ (32), నల్లాని జయరామయ్య, బొట్టు రాఘవేంద్రలను అదుపులోకి తీసుకున్నారు.

విచారణలో, ఈ ముగ్గురూ ఒక ముఠాగా ఏర్పడి శేషాచలం అడవుల్లో ఎర్రచందనం చెట్లను అక్రమంగా నరికి, వాటిని దుంగలుగా మార్చి, ఢిల్లీ, తమిళనాడు, కర్ణాటక రాష్ట్రాలలోని ప్రధాన స్మగ్లర్లకు అధిక ధరలకు విక్రయించేందుకు ప్రణాళిక రచించినట్లు వెల్లడైంది. నార్పల మండలం పరిధిలోని బొందలవాడ నుండి బొమ్మలాటపల్లి గ్రామానికి వెళ్లే మట్టి రహదారి సమీపంలో జయరామయ్యకు చెందిన పొలంలోని రేకుల షెడ్ పక్కన ఎర్రచందనం దుంగలను డంప్ చేసి దాచిపెట్టినట్లు గుర్తించారు.

టాస్క్ ఫోర్స్ బృందం దాడిలో మొత్తం 109 ఎర్రచందనం దుంగలను స్వాధీనం చేసుకున్నారు. అక్రమ రవాణాకు వినియోగించిన ఒక కారును కూడా సీజ్ చేశారు. స్వాధీనం చేసుకున్న ఎర్రచందనం దుంగలు, వాహనం కలిపి సుమారు రూ.2 కోట్ల విలువ ఉంటుందని అధికారులు అంచనా వేశారు.

ఈ కేసులో భాగమైన ఇతర ప్రధాన సూత్రధారులు, అంతర్రాష్ట్ర స్మగ్లర్లను గుర్తించి అరెస్ట్ చేసేందుకు ప్రత్యేక దర్యాప్తు కొనసాగుతోంది. ఢిల్లీ, తమిళనాడు, కర్ణాటక రాష్ట్రాల్లోని ప్రధాన కొనుగోలుదారులు, స్మగ్లింగ్ నెట్వర్క్‌లకు సంబంధించిన వ్యక్తులపై కూడా విచారణ చేపట్టబడుతోంది.

ఈ ఆపరేషన్‌ను విజయవంతంగా నిర్వహించి, భారీ మొత్తంలో ఎర్రచందనం దుంగలను స్వాధీనం చేసుకుని, నిందితులను అరెస్ట్ చేసిన టాస్క్ ఫోర్స్ సిబ్బందిని టాస్క్ ఫోర్స్ హెడ్ ఎల్. సుబ్బరాయుడు ప్రత్యేకంగా అభినందించి రివార్డులు ప్రకటించారు. శేషాచలం అడవుల్లో ఎర్రచందనం అక్రమ నరికివేత, నిల్వ, రవాణా, స్మగ్లింగ్ కార్యకలాపాలపై భవిష్యత్తులోనూ కఠిన చర్యలు కొనసాగుతాయని, అక్రమ రవాణాకు పాల్పడే వారిపై నిర్దాక్షిణ్యంగా చట్టపరమైన చర్యలు అమలు చేయబడతాయని అధికారులు స్పష్టం చేశారు.