కామారెడ్డిలో కల్తీ కల్లు విక్రయం: ఇద్దరు అరెస్ట్, 60 సీసాలు స్వాధీనం

ఆకస్మిక తనిఖీలు

విశ్వసనీయ సమాచారం మేరకు బుధవారం తాడ్వాయి ఎస్సై నరేష్ ఆధ్వర్యంలో పోలీసులు కరడ్పల్లి గ్రామంలోని ఓ కల్లు దుకాణంపై ఆకస్మిక తనిఖీలు నిర్వహించారు. ఈ సందర్భంగా దుకాణంలో ఉన్న విక్రేత సీతూరి అలియాస్ గౌండ్ల పోచాగౌడ్ను అదుపులోకి తీసుకుని తనిఖీలు చేపట్టగా, విక్రయానికి సిద్ధంగా ఉంచిన 60 కల్లు సీసాలను స్వాధీనం చేసుకున్నారు.

కల్తీ అంగీకారం

విచారణలో కల్లులో ఆల్ప్రాజోలామ్ మత్తు పదార్థం కలిపి విక్రయిస్తున్నట్లు అతను అంగీకరించాడు. అదే సమయంలో అక్కడ కల్లు తాగుతున్న ఇద్దరికి నిర్వహించిన ప్రాథమిక డ్రగ్ టెస్టులో బెంజోడయాజెపైన్ పాజిటివ్గా తేలింది. అనంతరం ప్రభుత్వ ఆస్పత్రిలో నిర్వహించిన వైద్య పరీక్షల్లోనూ ఇదే విషయం నిర్ధారణ అయింది.

లైసెన్స్ హోల్డర్ అరెస్ట్

దర్యాప్తులో భాగంగా గురువారం దుకాణ లైసెన్స్ హోల్డర్ కొండాపురం స్వామిగౌడ్ను అదుపులోకి తీసుకుని విచారించగా, అధిక లాభాల కోసం కల్తీకి పాల్పడినట్లు అంగీకరించాడు. దీంతో ఇద్దరు నిందితులపై కేసు నమోదు చేసి కోర్టులో హాజరుపరుస్తున్నట్లు సీఐ సంతోష్ కుమార్ వెల్లడించారు.