చదువుకున్న బడికి షబ్బీర్ అలీ కానుక: రూ.5 కోట్లతో ఆధునిక హంగులతో నూతన భవనం

ఈ సందర్భంగా షబ్బీర్ అలీ మాట్లాడుతూ, తాను 1971లో విద్యనభ్యసించిన ఈ పాఠశాల తన జీవితంలో ఎంతో ప్రత్యేకమైన స్థానాన్ని కలిగి ఉందని అన్నారు. తాను ఎంత ఉన్నత స్థాయికి ఎదిగినా తనకు విద్యాబుద్ధులు నేర్పిన గురువులు, మిత్రులు, పాఠశాల జ్ఞాపకాలను ఎప్పటికీ మరచిపోలేనని భావోద్వేగంగా తెలిపారు.

బాయ్స్ స్కూల్ అభివృద్ధి అవసరాలను ముఖ్యమంత్రి రేవంత్ రెడ్డి దృష్టికి తీసుకెళ్లి రూ.5 కోట్ల నిధులు మంజూరు చేయించేందుకు కృషి చేశానని తెలిపారు. పాత భవనం స్థానంలో ఆధునిక తరగతి గదులు, డిజిటల్ విద్యా సౌకర్యాలు, కంప్యూటర్ ల్యాబ్లు, ప్రయోగశాలలతో నూతన భవనం నిర్మిస్తామని తెలిపారు.

ఇన్చార్జి మంత్రి సీతక్క, ఎంపీ షెట్కర్, ఎమ్మెల్యే లక్ష్మీకాంతరావు షబ్బీర్ అలీ కృషిని అభినందించారు. జిల్లా కలెక్టర్ ఆశిష్ సంగ్వాన్ మాట్లాడుతూ, నూతన భవనంతో విద్యార్థులకు మెరుగైన విద్యా వాతావరణం అందుబాటులోకి వస్తుందని తెలిపారు. ఈ కార్యక్రమంలో అధికారులు, ఉపాధ్యాయులు, పూర్వ విద్యార్థులు, ప్రస్తుత విద్యార్థులు పాల్గొన్నారు.