ప్రపంచ సినీ రంగంలో అత్యుత్తమ ప్రతిభను గుర్తించే 98వ అకాడమీ అవార్డుల (ఆస్కార్) వేడుక లాస్ ఏంజిల్స్లోని డాల్బీ థియేటర్లో అట్టహాసంగా జరుగుతోంది. ఈ ఏడాది సినీ రంగంలో విశేష కృషి చేసిన వారికి పురస్కారాలు అందజేస్తున్నారు. ప్రముఖ హాస్యనటుడు, టీవీ వ్యాఖ్యాత కోనన్ ఓ'బ్రియన్ ఈ ప్రతిష్టాత్మక అవార్డుల కార్యక్రమానికి వ్యాఖ్యాతగా వ్యవహరిస్తున్నారు.
ప్రియాంక చోప్రా, రాబర్ట్ డౌనీ జూనియర్, క్రిస్ ఎవాన్స్, యాన్ హాత్వే, గ్విన్నెత్ పాల్ట్రో వంటి పలువురు ప్రముఖ తారలు అవార్డులను ప్రదానం చేస్తున్నారు. పశ్చిమాసియాలో నెలకొన్న ఉద్రిక్తతల నేపథ్యంలో వేదిక వద్ద భద్రతను కట్టుదిట్టం చేశారు.
ఇప్పటికే పలు విభాగాల్లో అవార్డుల ప్రకటన జరిగింది. 'వెపన్స్' చిత్రంలో నటనకు గాను అమీ మాడిగన్ ఉత్తమ సహాయ నటి అవార్డును గెలుచుకున్నారు. 'KPop డెమోన్ హంటర్స్' ఉత్తమ యానిమేటెడ్ ఫీచర్గా, 'ది గర్ల్ హూ క్రైడ్ పెర్ల్స్' ఉత్తమ యానిమేటెడ్ షార్ట్ ఫిల్మ్గా నిలిచాయి. 'ఫ్రాంకెన్స్టీన్' చిత్రం ఉత్తమ కాస్ట్యూమ్ డిజైన్, ఉత్తమ మేకప్ అండ్ హెయిర్స్టైలింగ్ విభాగాల్లో పురస్కారాలు సొంతం చేసుకుంది. ఈ ఏడాది కొత్తగా ప్రవేశపెట్టిన ఉత్తమ కాస్టింగ్ విభాగంలో 'వన్ బ్యాటిల్ ఆఫ్టర్ అనదర్' చిత్రానికి కసాండ్రా కులుకుండిస్ అవార్డు అందుకున్నారు. ఉత్తమ లైవ్ యాక్షన్ షార్ట్ ఫిల్మ్ విభాగంలో 'ది సింగర్స్', 'టూ పీపుల్ ఎక్స్ఛేంజింగ్ సలైవా' చిత్రాలు సంయుక్తంగా అవార్డును పంచుకున్నాయి.
