బంగ్లాదేశ్ మాజీ ప్రధానమంత్రి షేక్ హసీనా దేశం విడిచి వెళ్లిన సమయంలో వెలుగులోకి వచ్చిన వీడియో వివాదంతో సంబంధం ఉన్నట్లు ప్రచారం జరిగిన మాజీ వైమానిక దళ అధికారి కె.ఎం. తహసీఫ్ సౌరీ (28) అనుమానాస్పద స్థితిలో మృతి చెందారు. ఢాకాలోని తురాగ్ నదిలో ఆయన మృతదేహాన్ని పోలీసులు గుర్తించారు. అంతకుముందు రోజు నుంచి ఆయన కనిపించకుండా పోయారు.
ఈ ఘటనపై కుటుంబ సభ్యులు హత్య అనుమానాలు వ్యక్తం చేయడంతో బంగ్లాదేశ్లో చర్చ మొదలైంది. అయితే ఆయన మరణానికి గల అసలు కారణం ఇంకా నిర్ధారణ కాలేదు. తన స్నేహితుడిని కలిసేందుకు ఇంటి నుంచి బయటకు వెళ్లిన తహసీఫ్ తిరిగి రాలేదు. మరుసటి రోజు ఢాకాలోని రాజబరి ఘాట్ సమీపంలో తురాగ్ నదిలో ఆయన మృతదేహం తేలుతూ కనిపించింది.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
పోలీసుల విచారణ
సమాచారం అందుకున్న నదీ పోలీసులు అక్కడికి చేరుకుని మృతదేహాన్ని స్వాధీనం చేసుకున్నారు. అనంతరం ఢాకాలోని షహీద్ సుహ్రావర్ది మెడికల్ కాలేజీ ఆసుపత్రికి తరలించారు. ప్రాథమిక పరిశీలనలో శరీరంపై బయటకు కనిపించే గాయాలు లేవని పోలీసులు తెలిపారు. అయితే ముక్కు నుంచి రక్తం వచ్చినట్లు ప్రాథమిక నివేదికలో పేర్కొన్నారు. మరణానికి గల కారణాన్ని నిర్ధారించేందుకు శవపరీక్షతో పాటు అవసరమైన నమూనాలను పరీక్షలకు పంపించారు. నివేదిక వచ్చిన తర్వాతే పూర్తి వివరాలు తెలుస్తాయని అధికారులు వెల్లడించారు.
