బదిలీ అయిన న్యాయమూర్తికి తొలి హైకోర్టు నుంచే పదవీ విరమణ ప్రయోజనాలు: ఒడిశా హైకోర్టు కీలక తీర్పు

ఒక హైకోర్టు నుంచి మరో హైకోర్టుకు బదిలీ అయిన న్యాయమూర్తి, పదవీ విరమణ తర్వాత కూడా తాను తొలిసారి నియమితులైన హైకోర్టు నుంచే రిటైర్మెంట్ ప్రయోజనాలు పొందేందుకు అర్హులేనని ఒడిశా హైకోర్టు కీలక తీర్పు ఇచ్చింది. మరో హైకోర్టుకు బదిలీ కావడం వల్ల గతంలో పనిచేసిన హైకోర్టు నుంచి పొందాల్సిన పదవీ విరమణ ప్రయోజనాలు రద్దు కావని స్పష్టం చేసింది.

అయితే, అదే తరహా ప్రయోజనాలను మరో హైకోర్టు నుంచి పొందకూడదనే షరతు వర్తిస్తుందని పేర్కొంది. ఒడిశా హైకోర్టు మాజీ న్యాయమూర్తి జస్టిస్ చిత్తరంజన్ దాస్ ఈ పిటిషన్ దాఖలు చేశారు. ఆయన 2007లో ఒడిశా హైకోర్టు న్యాయమూర్తిగా నియమితులయ్యారు. అనంతరం 2010లో కలకత్తా హైకోర్టుకు బదిలీ అయ్యారు. అక్కడ పనిచేస్తూ 2018లో పదవీ విరమణ చేశారు. రిటైర్మెంట్కు ముందే తనకు వర్తించే వైద్య సదుపాయాలు, ఇంటి పనుల సహాయకుడు, డ్రైవర్ తదితర భత్యాలను తాను తొలిసారి నియమితులైన హైకోర్టు నుంచే పొందాలని ప్రభుత్వానికి విజ్ఞప్తి చేశారు. అయితే, ఒడిశా ప్రభుత్వం 2013లో జారీ చేసిన ఉత్తర్వుల్లో వైద్య సదుపాయాలు పొందేందుకు మాత్రమే అనుమతించింది. ఇంటి పనుల సహాయకుడు, డ్రైవర్, భద్రత, కార్యదర్శి సేవలు, టెలిఫోన్ తదితర సదుపాయాలకు సంబంధించిన భత్యాలను మంజూరు చేయలేదు. దీంతో ఆయన ఒడిశా హైకోర్టును ఆశ్రయించారు.

ఒడిశా ప్రభుత్వం 2014లో జారీ చేసిన మార్గదర్శకాల ప్రకారం పదవీ విరమణ చేసిన హైకోర్టు న్యాయమూర్తులకు వివిధ సదుపాయాలు కల్పిస్తోంది. ఇంటి పనుల సహాయకుడు, డ్రైవర్ ఖర్చుల కోసం నెలకు రూ.45,000, టెలిఫోన్, ఇంటర్నెట్, కార్యదర్శి సేవలు, భద్రత కోసం నెలకు రూ.15,000 చొప్పున భత్యాలు అందిస్తోంది. ఈ మొత్తాలపై ఏటా 5 శాతం పెంపు కూడా ఉంటుంది. ఈ ప్రయోజనాలను పొందేందుకు సంబంధిత నిబంధనలు, అర్హతలు వర్తిస్తాయి. జస్టిస్ సంజీవ్ కె. పాణిగ్రాహి, జస్టిస్ మురహరి శ్రీరామన్లతో కూడిన డివిజన్ బెంచ్ ఈ పిటిషన్ను విచారించింది. ఒక హైకోర్టు నుంచి మరో హైకోర్టుకు బదిలీ కావడం న్యాయసేవలో భాగమని పేర్కొంది. మొదట నియమితులైన హైకోర్టులో ఎన్నో సంవత్సరాలు సేవలందించిన న్యాయమూర్తికి, కేవలం బదిలీ కారణంగా అక్కడి ప్రయోజనాలను నిరాకరించలేమని స్పష్టం చేసింది. పదవీ విరమణ చేసిన న్యాయమూర్తులకు కల్పించే సదుపాయాలు ప్రభుత్వం ఇచ్చే రాయితీలు లేదా ప్రత్యేక కానుకలు కావని, ప్రజాసేవలో జీవితకాలం గడిపిన వారికి గౌరవప్రదమైన జీవనం కల్పించేందుకు ఉద్దేశించినవని వ్యాఖ్యానించింది.