బస్వన్నపల్లిలో 16 సీసీ కెమెరాల ప్రారంభం: నేరాల నియంత్రణకు కీలకమని డీఎస్పీ

ఈ సందర్భంగా డీఎస్పీ మాట్లాడుతూ, గ్రామంలోని ప్రతి వీధి, ప్రధాన కూడళ్లలో సీసీ కెమెరాలు ఏర్పాటు చేయడం ద్వారా దొంగతనాలు, ఈవ్టీజింగ్, అసాంఘిక కార్యకలాపాలను నియంత్రించవచ్చన్నారు. నేరాలు జరిగినప్పుడు కెమెరా ఫుటేజీ ఆధారంగా నిందితులను త్వరగా గుర్తించి కేసులను ఛేదించేందుకు అవకాశం ఉంటుందన్నారు. ప్రజల భాగస్వామ్యంతో ఆధునిక సాంకేతికతను వినియోగించుకోవడం ద్వారా గ్రామ భద్రతను మరింత బలోపేతం చేయవచ్చన్నారు.

అభినందనలు, సూచనలు

సీసీ కెమెరాల ఏర్పాటులో చొరవ చూపిన సర్పంచ్, పాలకవర్గ సభ్యులు, యువత, గ్రామ ప్రజలను ఎస్పీ ఎం. రాజేష్ చంద్ర ఐపీఎస్ అభినందించారు. ఇతర గ్రామాలు కూడా బస్వన్నపల్లిని ఆదర్శంగా తీసుకుని సీసీ కెమెరాలు ఏర్పాటు చేసుకోవాలని సూచించారు.

పోలీసుల సూచనలు

రాత్రివేళల్లో ఇళ్లకు తాళాలు వేసి డాబాలపై నిద్రించవద్దని, తాళం చెవులను బహిరంగ ప్రదేశాల్లో ఉంచవద్దని పోలీసులు సూచించారు. అనుమానాస్పద వ్యక్తులు కనిపిస్తే వెంటనే పోలీసులకు సమాచారం ఇవ్వాలని కోరారు. కెమెరాలను గ్రామ ఆస్తిగా భావించి సంరక్షించాలని తెలిపారు. కార్యక్రమంలో పోలీసు అధికారులు, ప్రజాప్రతినిధులు, యువత, గ్రామస్తులు పాల్గొన్నారు.