చిత్తూరు జిల్లా ఎస్పీ తుషార్ డూడి 195 మంది కొత్త కానిస్టేబుళ్లతో సమావేశం

జిల్లాకు ఎంపికైన 59 మంది మహిళా కానిస్టేబుళ్లు ఒంగోలు శిక్షణ కేంద్రంలో, 136 మంది పురుష కానిస్టేబుళ్లు ఏలూరు శిక్షణ కేంద్రంలో శిక్షణ పూర్తి చేసుకున్నారని తెలిపారు. శిక్షణలో నేర్చుకున్న అంశాలు, ఎదురైన అనుభవాలు, అభివృద్ధి చేసుకున్న నైపుణ్యాల గురించి ఎస్పీ ఆరా తీశారు.

ఈ సందర్భంగా ఎస్పీ తుషార్ డూడి మాట్లాడుతూ, పోలీసు విధుల్లో క్రమశిక్షణ, సమయపాలన, అప్రమత్తత, ప్రజలతో మర్యాదపూర్వకంగా వ్యవహరించడం, బృంద స్ఫూర్తి ఎంతో ముఖ్యమని తెలిపారు. శిక్షణలో నేర్చుకున్న అంశాలను కేవలం శిక్షణ కేంద్రానికే పరిమితం చేయకుండా విధి నిర్వహణలో ఆచరణలో పెట్టాలని సూచించారు.

ప్రజలతో నేరుగా సంబంధం ఉండే విధుల్లో పోలీసుల ప్రవర్తన కీలకమని, ప్రతి ఒక్కరూ ప్రజల సమస్యలను ఓర్పుతో విని చట్టపరమైన పరిధిలో సహాయం అందించాలని దిశా నిర్దేశం చేశారు. తమకు అప్పగించిన బాధ్యతలను నిజాయితీగా, అంకితభావంతో నిర్వహించాలని సూచించారు.

ప్రస్తుత పోలీసింగ్లో సాంకేతిక పరిజ్ఞానం కీలకంగా మారిందని, కంప్యూటర్ పరిజ్ఞానం, సాంకేతిక నైపుణ్యాలతో పాటు క్షేత్రస్థాయి ప్రాక్టికల్ నైపుణ్యాలను అభివృద్ధి చేసుకోవాలని సూచించారు.

ఇప్పటికే ప్రాథమిక శిక్షణ పూర్తయినా విధుల్లో మరింత నైపుణ్యం కోసం మరో 45 రోజుల పాటు ప్రత్యేక శిక్షణ ఇవ్వాలని డీఎస్పీ డీటీసీ జె. రాంబాబుకు ఆదేశించారు. ఈ శిక్షణలో ఫుట్ పెట్రోలింగ్, కార్డన్ అండ్ సెర్చ్, డ్రంక్ అండ్ డ్రైవ్, వాహన తనిఖీలు, నేర నియంత్రణ వంటి అంశాలపై ప్రాక్టికల్ శిక్షణ ఇవ్వాలని సూచించారు.