వసతిగృహంలో విద్యార్థుల భోజనంతో అవకతవకలు: ఉపాధ్యాయుడిపై ఆరోపణలు, విచారణకు సంఘాల డిమాండ్

విద్యార్థుల భోజనం కోసం 10 కిలోల 800 గ్రాముల చికెన్ తీసుకువచ్చినట్లు వంట సిబ్బంది తెలిపారు. అయితే, అసోసియేషన్ ప్రతినిధులు వంట సిబ్బందిని విచారించగా, అందులో సుమారు 3 కిలోల చికెన్ను పక్కకు తీసి ఫ్రై చేసి ఇవ్వాలని తెలుగు ఉపాధ్యాయుడు మలావత్ లక్ష్మణ్ కుమార్ చెప్పినట్లు వంట మాస్టర్ అసోసియేషన్ వారికి తెలిపారు. విద్యార్థుల కోసం ప్రభుత్వం కేటాయించిన ఆహార పదార్థాలలో కొంత భాగాన్ని పక్కకు తీసేలా ఆదేశాలు ఇచ్చారా ఆ ఆహారం ఎవరి కోసం వినియోగించబడింది అనే అంశాలపై సమగ్ర విచారణ జరపాలని అసోసియేషన్ డిమాండ్ చేసింది.

వార్డెన్ గైర్హాజరు, అపరిశుభ్రత

అదేవిధంగా, వసతిగృహంలోని వాటర్ ట్యాంక్ పాచితో, అపరిశుభ్రంగా ఉన్నట్లు సందర్శనలో గుర్తించారు. విద్యార్థులకు తాగునీటి పరిశుభ్రతపై అధికారులు తక్షణ చర్యలు తీసుకోవాలని కోరారు. మధ్యాహ్నం 1:33 గంటల వరకు విద్యార్థులకు భోజనం వడ్డించలేదని, విద్యార్థుల వసతిగృహ నిర్వహణకు బాధ్యత వహించే వార్డెన్ అందుబాటులో లేకపోవడం పలు అనుమానాలకు తావిస్తోందని తెలిపారు.

జిల్లా కలెక్టర్ జోక్యానికి విజ్ఞప్తి

తెలుగు ఉపాధ్యాయుడు మలావత్ లక్ష్మణ్ కుమార్ వ్యవహారశైలిపై గతంలో ఫిర్యాదులు ఉన్నాయా, ఆయనకు పాఠశాల ప్రిన్సిపల్, సంబంధిత అధికారుల నుంచి ఏమైనా అండదండలు ఉన్నాయా, వార్డెన్ అందుబాటులో లేకపోయినా వసతిగృహ నిర్వహణపై పర్యవేక్షణ ఎలా జరుగుతోందనే అంశాలపై జిల్లా అధికారులు స్వతంత్రంగా విచారించాలని కోరారు. విద్యార్థుల భోజనం, తాగునీరు, ఆరోగ్యం, భద్రత అంశం కావడంతో జిల్లా కలెక్టర్ వెంటనే ప్రత్యేక అధికారులతో ఆకస్మిక తనిఖీ నిర్వహించి, స్టాక్ రిజిస్టర్లు, చికెన్ కొనుగోలు బిల్లులు, మెనూ రిజిస్టర్లు, హాజరు రికార్డులు, వార్డెన్ విధుల రికార్డులు పరిశీలించాలని ఎపి ఎరుకుల డెవలప్మెంట్ అసోసియేషన్, గిరిజన అభివృద్ధి సంఘాలు కోరుతున్నాయి.

విద్యార్థుల కోసం కేటాయించిన ఆహార పదార్థాలను వ్యక్తిగత అవసరాలకు వినియోగించినట్లు, విధులలో నిర్లక్ష్యం, అవకతవకలు జరిగినట్లు విచారణలో నిర్ధారణ అయితే బాధ్యులపై కఠినమైన శాఖాపరమైన, చట్టపరమైన చర్యలు తీసుకోవాలని అసోసియేషన్ సభ్యులు డిమాండ్ చేశారు. విద్యార్థుల హక్కులు, ఆరోగ్యం, భద్రత విషయంలో రాజీ పడకుండా జిల్లా యంత్రాంగం తక్షణమే స్పందించాలని ఎపి ఎరుకుల డెవలప్మెంట్ అసోసియేషన్, గిరిజన అభివృద్ధి సంఘాలు విజ్ఞప్తి చేశాయి.