అన్నమయ్య జిల్లాలో స్థానిక ఎన్నికల నిబంధనలు: అతిక్రమిస్తే అనర్హత వేటు తప్పదు

వేర్వేరు పార్టీలకు చెందిన అభ్యర్థులు ఒకే సమయంలో, ఒకే మార్గంలో ర్యాలీగా వెళ్లరాదని, ముందుగా పోలీసులకు సమాచారం ఇచ్చి, సూచించిన సమయాల్లో మాత్రమే వెళ్లాలని ఎస్పీ తెలిపారు. ఒకేసారి వచ్చి ఘర్షణ పడితే సంబంధిత అభ్యర్థులపై అల్లర్లు (), ప్రభుత్వ విధులకు ఆటంకం కలిగించినట్లు కేసులు నమోదు చేసి, తక్షణమే అరెస్ట్ చేయడం జరుగుతుందని హెచ్చరించారు. సభలు, ర్యాలీలు, రోడ్ షోలు నిర్వహించే వారు 48 గంటల ముందే పోలీసు అనుమతి తీసుకోవాలని, ప్రచార వాహనాలకు పాస్ తప్పనిసరిగా ఉండాలని సూచించారు. ఒకే ప్రాంతంలో రెండు పార్టీలు ఒకేసారి సభలు పెట్టకూడదని, అనుమతి లేని సభలు, ర్యాలీలపై కేసులు నమోదు చేసి, ఎన్నికలు ముగిసే వరకు ప్రచార వాహనాలను సీజ్ చేస్తారని తెలిపారు. ర్యాలీలు నిర్వహించడానికి పోలీసుల ముందస్తు అనుమతి తప్పనిసరి అని, అనుమతి లేకుండా ర్యాలీలు నిర్వహిస్తే, నిబంధనలు ఉల్లంఘించిన వారిపై చట్టప్రకారం చర్యలు తీసుకుంటారని పేర్కొన్నారు.

మైకుల వాడకం, నగదు, బహుమతులపై ఆంక్షలు

ఉదయం 06:00 గంటల నుండి రాత్రి 10:00 గంటల వరకు మాత్రమే మైకులు వాడాలని, ఆసుపత్రులు, విద్యాసంస్థలు, ప్రార్థనా మందిరాల వద్ద (సైలెంట్ జోన్స్) మైకులు వాడరాదని సూచించారు. నిబంధనలు మీరితే సౌండ్ సిస్టమ్, వాహనాలను సీజ్ చేసి, పర్యావరణ పరిరక్షణ, పోలీసు చట్టాల కింద జరిమానాలు విధిస్తారని తెలిపారు. ఓటర్లను ఆకర్షించేందుకు మద్యం, నగదు, బహుమతులు పంపిణీ చేయడం చట్టరీత్యా తీవ్రమైన నేరమని, పట్టుబడితే ఎన్నికల అధికారులకు నివేదించి, అభ్యర్థిత్వం రద్దు (అనర్హత వేటు) చేయిస్తారని, అక్రమ రవాణా చేసే వారిని నాన్-బెయిలబుల్ కేసుల కింద రిమాండ్కు తరలిస్తారని చెప్పారు.

సోషల్ మీడియాపై నిఘా, వ్యక్తిగత దూషణలపై చర్యలు

ప్రత్యర్థి పార్టీలపై వ్యక్తిగత దూషణలు, కుల-మత విద్వేషాలను రెచ్చగొట్టేలా అసత్య ప్రచారాలు ( ), మార్ఫింగ్ ఫోటోలు పోస్ట్ చేయరాదని, వాట్సాప్, ఫేస్బుక్, ఎక్స్ () వంటి సామాజిక మాధ్యమాలపై పోలీసు నిఘా ఉంటుందని తెలిపారు. ఐటీ చట్టం ( ), సైబర్ క్రైమ్ నిబంధనల కింద పోస్ట్ చేసిన వ్యక్తులతో పాటు, గ్రూప్ అడ్మిన్లపై కఠిన కేసులు నమోదు చేసి జైలుకు పంపుతారని హెచ్చరించారు. ప్రత్యర్థి పార్టీలపై వ్యక్తిగత దూషణలు చేయడం, రెచ్చగొట్టే వ్యాఖ్యలు చేయడం, ఇతరుల ప్రచారాలకు ఆటంకం కలిగించడం, ఫ్లెక్సీలు చించివేయడం నిషిద్ధమని, దౌర్జన్యం, ఆస్తుల ధ్వంసం ( ) కింద క్రిమినల్ కేసులు నమోదు చేస్తారని పేర్కొన్నారు.

ప్రైవేట్ ఇళ్లపై అనుమతి లేకుండా ఫ్లెక్సీలు కట్టడం నిషిద్ధమని, ప్రభుత్వ ఆస్తులపై ఎలాంటి ప్రచార సామగ్రిని ఏర్పాటు చేయరాదని సూచించారు. అనుమతి లేకుండా ఫ్లెక్సీలు కడితే ఎన్నికల ఖర్చు ఖాతాలో చేర్చడమే కాకుండా, పబ్లిక్ ప్రాపర్టీ డిఫేస్మెంట్ యాక్ట్ కింద కేసులు నమోదు చేస్తారని తెలిపారు. సరైన పత్రాలు, ఆధారాలు లేకుండా ఎవరూ కూడా రూ. 50,000 కంటే ఎక్కువ నగదును కలిగి ఉండరాదని, తనిఖీల్లో సరైన పత్రాలు లేని రూ. 50 వేల కంటే ఎక్కువ నగదు ఉంటే సీజ్ చేస్తారని తెలిపారు. అలాగే, సరైన పత్రాలు, ఆధారాలు లేకుండా విలువైన వస్తువులను రవాణా చేయరాదని, తనిఖీల్లో పట్టుబడితే వాటిని సీజ్ చేయడం జరుగుతుందని చెప్పారు.

లైసెన్స్డ్ ఆయుధాలను వెంటనే పోలీసులకు డిపాజిట్ చేయాలని, గొడవలు సృష్టించే రౌడీషీటర్లు, పాత నేరస్థులపై ఇప్పటికే బైండోవర్లు ( ) చేయడం జరిగిందని, వాటిని ఉల్లంఘిస్తే నేరుగా జైలుకే పంపుతారని హెచ్చరించారు. స్థానిక ఎన్నికలు మన ఊరి భవిష్యత్తును నిర్ణయించేవని, వీటిని పండుగ వాతావరణంలో బాధ్యతాయుతంగా జరుపుకుందామని ఎస్పీ ధీరజ్ కునుబిల్లి అన్నారు. ఓటర్లు ఎలాంటి భయాలు, ప్రలోభాలకు గురికాకుండా తమ ఓటు హక్కును స్వేచ్ఛగా వినియోగించుకోవాలని, అభ్యర్థులు హుందాగా వ్యవహరించాలని సూచించారు. కేవలం గెలవాలన్న కసితో చట్టాన్ని చేతుల్లోకి తీసుకున్నా, అడ్డదారులు తొక్కినా వారిపై జీవితకాలం మాయని మచ్చలా క్రిమినల్ కేసులు నమోదవుతాయని, ప్రశాంత ఎన్నికల కోసం జిల్లా ప్రజలు పోలీసులకు సహకరించాలని కోరారు.

ఎన్నికల కోడ్ ఉల్లంఘనలు, డబ్బు/మద్యం పంపిణీ, బెదిరింపులకు సంబంధించిన సమాచారాన్ని ప్రజలు నిర్భయంగా పోలీసులకు తెలియజేయవచ్చని, ఫిర్యాదుదారుల వివరాలను గోప్యంగా ఉంచుతామని ఎస్పీ తెలిపారు. అత్యవసర పరిస్థితుల్లో స్థానిక పోలీస్ స్టేషన్కు లేదా పోలీస్ ఎమర్జెన్సీ నంబర్లకు డయల్ 100/112 కు కాల్ చేయాలని సూచించారు.