స్థానిక ఎన్నికల్లో ఏకగ్రీవాలు కావు బలాత్కారాలు: వైఎస్ షర్మిల

16 మున్సిపాలిటీలు, 639 వార్డులు, 4 జెడ్పీటీసీలు, 32 ఎంపీటీసీల స్థానాల్లో జరిగినవి ఏకగ్రీవాలు కావని, కూటమి పార్టీల భయోత్పాతానికి నిదర్శనమని ఆమె పేర్కొన్నారు. ఇది ప్రభంజనం కాదని, కూటమి పార్టీల రాజకీయ నిస్తేజమని ఆమె ఎద్దేవా చేశారు.

ఆనాడు వైసీపీ చేసిందని నేడు మీరు చేస్తారా వాళ్ళు గడ్డి తిన్నారని మీరు అదే తింటారా అని ఆమె కూటమి నేతలను ప్రశ్నించారు. కూటమి ప్రభుత్వంపై ప్రజలకు నమ్మకం లేదా బలవంతపు ఏకగ్రీవాల పేరుతో ఎందుకీ విచక్షణా రాహిత్యం అని ఆమె నిలదీశారు.

రాష్ట్ర ఎన్నికల సంఘాన్ని ఆంధ్రప్రదేశ్ కాంగ్రెస్ పార్టీ పక్షాన డిమాండ్ చేస్తున్నామని, బలవంతపు ఏకగ్రీవాలపై చర్యలు తీసుకోవాలని ఆమె కోరారు. ఫలితాలను నిలిపివేసి పూర్తి స్థాయి విచారణ జరపాలని, ఈ విషయంలో రాష్ట్ర ఎన్నికల సంఘం ప్రజా హక్కులను కాపాడేలా నిష్పక్షపాతంగా వ్యవహరించాలని ఆమె డిమాండ్ చేశారు.