భారత్-ఆసియాన్ దేశాల మధ్య యువతను అనుసంధానించే కార్యక్రమం ప్రజల మధ్య సంబంధాలను మరింత బలోపేతం చేస్తుందని రక్షణ మంత్రి రాజ్నాథ్ సింగ్ అన్నారు. డిజిటల్ ఆవిష్కరణలు, సామర్థ్యాల అభివృద్ధికి ఈ కార్యక్రమం దోహదపడుతుందని పేర్కొన్నారు. ఫిలిప్పీన్స్లోని సెబూలో జరుగుతున్న 13వ ఆసియాన్ రక్షణ మంత్రుల సమావేశం ప్లస్ (ఏడీఎంఎం-ప్లస్) వేదికగా ఆయన ఈ అంశాలను ప్రస్తావించారు.
భారత్, ఆగ్నేయాసియా దేశాల మధ్య రక్షణ సహకారంతో పాటు ప్రజల మధ్య సంబంధాలను బలోపేతం చేయడం కూడా కీలకమని రాజ్నాథ్ సింగ్ అభిప్రాయపడ్డారు. యువతకు పరస్పర పరిచయాలు, నైపుణ్యాల అభివృద్ధి, సాంకేతిక పరిజ్ఞాన మార్పిడికి అవకాశాలు కల్పించడం ద్వారా ప్రాంతీయ సహకారాన్ని మరింత విస్తరించవచ్చని పేర్కొన్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
యువతకు కొత్త అవకాశాలు
భారత్-ఆసియాన్ దేశాల మధ్య యువతకు మరిన్ని అవకాశాలు కల్పించాలనే లక్ష్యంతో ప్రతిపాదించిన ఇండియా-ఆసియాన్ యూత్ బ్రిడ్జ్ కార్యక్రమం ప్రాధాన్యతను రాజ్నాథ్ సింగ్ వివరించారు. ఈ కార్యక్రమం ద్వారా యువత పరస్పరం అనుసంధానమై, తమ అనుభవాలను పంచుకునేందుకు అవకాశం ఉంటుందని తెలిపారు.
