ఒమన్ తీరంలో భారత జెండాతో ప్రయాణిస్తున్న వాణిజ్య నౌక ఎంఎస్వీ అల్ జుసుఫీపై జరిగిన దాడిలో ఒక భారతీయ నావికుడు మృతి చెందడంపై భారత్ తీవ్ర ఆందోళన వ్యక్తం చేసింది. ఈ ఘటనను ఖండించిన విదేశాంగ శాఖ, పశ్చిమాసియాలో తక్షణమే ఉద్రిక్తతలు తగ్గించాలని, చర్చల ద్వారా సమస్య పరిష్కరించుకోవాలని పిలుపునిచ్చింది.
భారత జెండాతో ప్రయాణిస్తున్న ఎంఎస్వీ అల్ జుసుఫీ ( ) నౌక సోమవారం సాయంత్రం ఒమన్ తీరంలోని లిమా సమీపంలో దాడికి గురైంది. ఈ నౌకలో మొత్తం 14 మంది భారతీయ సిబ్బంది ఉన్నారు. వారిలో 13 మందిని ఒమన్ కోస్ట్గార్డ్ సురక్షితంగా రక్షించింది. అయితే, గుజరాత్కు చెందిన గంధర్ నహీమ్ అజీజ్ అనే నావికుడు గాయాలతో చికిత్స పొందుతూ మరణించినట్లు కేంద్ర నౌకాయాన శాఖ మంత్రి సర్బానంద సోనోవాల్ వెల్లడించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ ఘటనపై స్పందించిన భారత విదేశాంగ శాఖ, వాణిజ్య నౌకలపై జరుగుతున్న దాడులు తీవ్ర ఆందోళన కలిగిస్తున్నాయని పేర్కొంది. సముద్ర రవాణాలో పనిచేసే నావికుల ప్రాణాలకు ముప్పు కలిగించే చర్యలను అంగీకరించబోమని స్పష్టం చేసింది. పౌరుల భద్రత, పౌర మౌలిక సదుపాయాల రక్షణకు ప్రాధాన్యం ఇవ్వాలని సంబంధిత పక్షాలకు సూచించింది.
