పేదల సంక్షేమమే లక్ష్యం.. ప్రభుత్వ పథకాల సమర్థ అమలుపై సీఎం చంద్రబాబు

తాను స్వయంగా వెళ్లి పెన్షన్ పంపిణీ చేసిన తులశమ్మ, పద్మమ్మల జీవన స్థితిగతులను సమావేశంలో ముఖ్యమంత్రి వివరించారు. ప్రభుత్వ పథకాలు, డ్వాక్రా రుణాల ద్వారా ఆ కుటుంబాలకు జరిగిన మేలును వర్క్ షాప్‌లో వెల్లడించారు. పేదల స్థితిగతులను మెరుగుపరిచేందుకు జీఎస్డీపీ, సీఏజీఆర్ గణాంకాలను బేరీజు వేసుకుని పాలన చేస్తున్నామని తెలిపారు.

తాను ఆర్థికశాస్త్రం చదివినా, ప్రజల నుంచే ఎక్కువగా నేర్చుకున్నానని సీఎం చంద్రబాబు అన్నారు. ఈ వర్క్ షాప్‌కు ఆర్థిక, పరిపాలన వ్యవహారాల్లో ప్రముఖ నిపుణులు హాజరుకావడం సంతోషకరమని పేర్కొన్నారు.

దేశంలోనే తొలిసారి 2020 విజన్ రూపొందించినప్పుడు విమర్శలు ఎదుర్కొన్నానని, మాజీ రాష్ట్రపతి అబ్దుల్ కలాం కూడా దేశానికి విజన్ డాక్యుమెంట్ తయారు చేయాలని భావించారని గుర్తుచేశారు. ఐటీతో ప్రపంచం కుగ్రామంగా మారిందని, ఐటీతో అభివృద్ధి సాధించవచ్చని బలంగా నమ్మానని, సర్వీస్ సెక్టార్ విప్లవాన్ని అందిపుచ్చుకుంటే అభివృద్ధి జరుగుతుందని విశ్వసించి అందుకు అనుగుణంగా పనిచేశామని తెలిపారు.

డేటానే సంపదగా మారిన రోజుల్లోకి వచ్చామని, డేటా ఆధారిత నిర్ణయాలకే భవిష్యత్ ఉంటుందని అన్నారు. ప్రజలకు ప్రభుత్వం సేవలు అందించడం ఎంత ముఖ్యమో, సంపద సృష్టికి ప్రైవేట్ రంగం నుంచి పెట్టుబడులు సాధించడం కూడా అంతే ముఖ్యమని, స్వర్ణాంధ్ర విజన్‌లో ప్రైవేట్ పెట్టుబడులను చేర్చామని వివరించారు.

అన్ని రంగాలకు సంబంధించిన డేటాను సేకరించడమే కాకుండా, డేటా అనుసంధానం కూడా ముఖ్యమని, డేటా లేక్ ద్వారా అన్ని శాఖల సమాచారం అనుసంధానం చేస్తామని తెలిపారు. హెల్త్ రికార్డులను డిజిటలైజ్ చేయడం ద్వారా సంజీవని ప్రాజెక్టు అమలుకు కార్యాచరణ రూపొందించామని, పేద-ధనికుల మధ్య అంతరాన్ని తగ్గించేందుకు పీ4 కార్యక్రమాన్ని అమలు చేశామని చెప్పారు.

సమాజం నుంచి లబ్ది పొంది ఎదిగినవారు సమాజానికి కొంతైనా ఇవ్వాలనే ఆలోచన నుంచే పీ4 కార్యక్రమం పుట్టిందని, ప్రతి కుటుంబ జీవన ప్రమాణాలు మెరుగుపడాలనేదే తమ లక్ష్యమని, రాష్ట్రంలో ఉమ్మడి కుటుంబాలను ప్రోత్సహించాలన్నది తమ ఆలోచన అని ముఖ్యమంత్రి చంద్రబాబు పేర్కొన్నారు.