వర్షాభావం, తీవ్రమైన ఎండల కారణంగా ఆదిలాబాద్ జిల్లాలో గొర్రెలు, మేకలకు మేత, తాగునీరు దొరకడం కష్టంగా మారింది. పచ్చిక బయళ్లు ఎండిపోవడంతో కాపరులు తమ మందలను నీరు, మేత లభించే ప్రాంతాల కోసం సుదూర ప్రాంతాలకు తరలించాల్సి వస్తోంది. ఇది పశుపోషణపై ఆధారపడిన కుటుంబాలకు ఆర్థికంగా తీవ్ర ఇబ్బందులు కలిగిస్తోంది.
ప్రస్తుతం గొర్రెల కాపరులు కోత పూర్తయిన సోయాబీన్ పొలాల్లో తమ మందలను మేపుతున్నారు. అయితే, అక్కడ కూడా నీటి లభ్యత పరిమితంగా ఉండటంతో పశువులను పోషించడం కష్టంగా మారిందని వారు ఆవేదన వ్యక్తం చేస్తున్నారు. నీరు, మేత అందుబాటులో లేకపోతే పశువులను అమ్ముకోవాల్సిన పరిస్థితి వస్తుందని కాపరులు ఆందోళన చెందుతున్నారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
కాపరుల ఇక్కట్లు
ఆదిలాబాద్ పట్టణంలోని ఖానాపూర్ కాలనీకి చెందిన గొర్రెల కాపరి విజ్జల గణేశ్, తన 100 గొర్రెలను తీసుకుని మండలం కప్పర్ల గ్రామ పరిసరాల్లోని సోయాబీన్ పొలాలకు వెళ్లారు. అక్కడ సమీపంలోని చిన్న వాగుల్లో నీరు అందుబాటులో ఉండటంతో మందను మేపుతున్నట్లు ఆయన తెలిపారు. ఆదిలాబాద్ నుంచి వచ్చిన సుమారు 11 మంది కాపరులు, దాదాపు 500 గొర్రెలతో కప్పర్ల శివార్లలో తాత్కాలికంగా ఉంటున్నారని గణేశ్ వివరించారు.
