అరెస్టు చేసేందుకు ప్రయత్నించిన పోలీసులపై కొడవలితో దాడికి యత్నించిన ఓ హిస్టరీషీటర్పై పోలీసులు కాల్పులు జరిపి అదుపులోకి తీసుకున్నారు. తమిళనాడులోని చెన్నై సమీపంలోని మణిమంగలం పోలీస్ స్టేషన్ పరిధిలోని కరసంగల్ అటవీ ప్రాంతంలో ఈ ఘటన చోటుచేసుకుంది. నిందితుడిపై 20కి పైగా క్రిమినల్ కేసులున్నాయి.
మదంబాక్కం ప్రాంతానికి చెందిన మహ్మద్ సద్దాం హుస్సేన్ (29)పై 20కి పైగా క్రిమినల్ కేసులున్నాయి. 2022లో మదంబాక్కం పంచాయతీ అధ్యక్షుడు వెంకటేశన్ హత్య కేసులోనూ అతడు ప్రధాన నిందితుడిగా ఉన్నాడు. గంజాయి విక్రయానికి సంబంధించిన కేసులో 2025 నుంచి పరారీలో ఉన్న అతడిపై రెండు కోర్టు వారెంట్లు ఉన్నట్లు పోలీసులు తెలిపారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
కరసంగల్ అటవీ ప్రాంతంలోని ఓ పాడుబడిన ఇంట్లో సద్దాం హుస్సేన్ దాక్కున్నట్లు సమాచారం అందడంతో మణిమంగలం పోలీసులు ప్రత్యేక బృందాన్ని ఏర్పాటు చేసి అక్కడికి వెళ్లారు. శుక్రవారం తెల్లవారుజామున అతడిని అదుపులోకి తీసుకునేందుకు ప్రయత్నించిన పోలీసులపై, కొడవలితో కానిస్టేబుల్ సతీశ్కుమార్పై దాడికి యత్నించినట్లు పోలీసులు తెలిపారు. ఈ ఘటనలో కానిస్టేబుల్ చేతికి గాయాలయ్యాయి.
