ఆస్ట్రేలియా స్టార్ ఓపెనర్ ట్రావిస్ హెడ్ జింబాబ్వేతో జరిగిన రెండో వన్డేలో అద్భుత శతకం సాధించాడు. కేవలం 84 బంతుల్లో 112 పరుగులు చేసిన హెడ్, తన వరుస వైఫల్యాలకు గట్టి సమాధానం ఇచ్చాడు. ఈ ఇన్నింగ్స్లో 15 ఫోర్లు, 3 సిక్సర్లు ఉన్నాయి.
ఇది హెడ్కు వన్డేల్లో ఎనిమిదో శతకం కాగా, గత ఏడాది యాషెస్ సిరీస్ తర్వాత అంతర్జాతీయ క్రికెట్లో అతడికి ఇదే తొలి సెంచరీ. అంతకుముందు వరుసగా నాలుగు అంతర్జాతీయ ఇన్నింగ్స్ల్లో ఒకే తరహాలో బ్యాట్కు తగిలిన బంతి వికెట్లను తాకడంతో అతడు ఔటయ్యాడు. బంగ్లాదేశ్తో జరిగిన టెస్టుల్లో 22, 17, 22 పరుగుల వద్ద, ఆ తర్వాత జింబాబ్వేతో తొలి వన్డేలో కేవలం 4 పరుగుల వద్ద ఇదే తరహాలో వికెట్ కోల్పోయాడు.
తాజా వార్తలు, అప్డేట్స్ అన్నీ మీ దగ్గర!
రోజువారీ వార్తలు మీ ఇన్బాక్స్కి పొందండి
రెండో వన్డేలోనూ ఇలాంటి సంఘటన ఎదురైంది. ఇన్నింగ్స్ ఏడో బంతికే బ్లెస్సింగ్ ముజరబాని బౌలింగ్లో హెడ్ ఆఫ్సైడ్ వైపు ఆడిన షాట్ లోపలి అంచును తాకి అతడి తొడ ప్యాడ్కు వెళ్లింది. అయితే ఈసారి బంతి వికెట్లను తాకలేదు. దాంతో హెడ్ సరదాగా చేతులు పైకెత్తి సంబరాలు చేసుకున్నాడు. గత నాలుగు సార్లు ఇదే తరహాలో ఔటైన విషయాన్ని గుర్తుచేసుకుంటూ, ప్రతిసారి బ్యాట్ను చెత్తబుట్టలో వేయాల్సి వస్తోందంటూ తర్వాత నవ్వుతూ వ్యాఖ్యానించాడు.
