ఏపీలోనే కొత్త ఉపాధి పథకం ప్రారంభం: కేంద్ర మంత్రి, సీఎం, డిప్యూటీ సీఎం…

ఈ ప్రారంభోత్సవ కార్యక్రమానికి కేంద్ర గ్రామీణాభివృద్ధిశాఖ మంత్రి శివరాజ్‌సింగ్‌ చౌహాన్, ముఖ్యమంత్రి చంద్రబాబు, డిప్యూటీ సీఎం పవన్ కళ్యాణ్ హాజరవుతారు. ఇటీవల ఢిల్లీ పర్యటనకు వెళ్లిన డిప్యూటీ సీఎం పవన్ కళ్యాణ్, ఈ పథకాన్ని ఏపీలో ప్రారంభించాలని కేంద్ర మంత్రిని కోరారు. ఆయన అభ్యర్థనపై సానుకూలంగా స్పందించిన శివరాజ్‌సింగ్‌ చౌహాన్, ఏపీలో ప్రారంభించేందుకు అంగీకరించారు.

ఈ క్రమంలో రాష్ట్ర పంచాయతీరాజ్, గ్రామీణాభివృద్ధిశాఖ కమిషనర్‌ కృష్ణతేజ, తిరుపతి జిల్లా అధికారులు ముక్కవారిపల్లెలో పర్యటించి, కార్యక్రమ నిర్వహణకు నిర్ణయం తీసుకున్నారు. గతంలో 2006 ఫిబ్రవరి 2న అనంతపురం జిల్లా బండ్లపల్లిలో అప్పటి యూపీఏ ప్రభుత్వం జాతీయ గ్రామీణ ఉపాధి హామీ పథకాన్ని ప్రారంభించింది. ఇప్పుడు వీబీ జీ రాం జీ పథకం కూడా ఏపీలోనే మొదలుకానుంది.

కేంద్ర ప్రభుత్వం మహాత్మాగాంధీ జాతీయ గ్రామీణ ఉపాధి హామీ పథకాన్ని రద్దు చేసి, దాని స్థానంలో 'వికసిత్‌ భారత్‌ గ్యారంటీ ఫర్‌ రోజ్‌గార్‌ అండ్‌ ఆజీవికా మిషన్‌-గ్రామీణ్‌' (విబి-జి రామ్జి యాక్ట్)ను తీసుకువచ్చింది. ఈ కొత్త చట్టాన్ని జూలై 1 నుంచి అమలు చేయనున్నట్లు కేంద్రం గతంలో ప్రకటించింది. ఈ పథకం ద్వారా గ్రామీణ కుటుంబాలకు 125 రోజుల చట్టబద్ధమైన వేతన ఉపాధికి హామీ ఇస్తారు. గ్రామీణ ప్రజలకు ఆదాయ కల్పన, జీవనోపాధి భద్రత, మౌలిక సదుపాయాల అభివృద్ధి, గ్రామీణ ప్రజల్లో పరివర్తన తీసుకురావడమే ఈ పథకం లక్ష్యం.

గతంలో ఉన్న ఎంజీనరేగా నుంచి వీబీజీరాంజీ కొత్త విధానానికి మారే ప్రక్రియలో కార్మికులకు ఎలాంటి ఇబ్బంది లేకుండా చర్యలు తీసుకుంటున్నారు. వేతనాలను నేరుగా కార్మికుల బ్యాంకు ఖాతాలు లేదా పోస్ట్‌ ఆఫీస్‌ ఖాతాల్లో జమ చేస్తారు. జాబ్ కార్డులు లేని కార్మికులు గ్రామపంచాయతీలో నమోదు చేసుకోవాలని సూచిస్తున్నారు. మొత్తం మీద వీబీజీరాంజీ పథకం ప్రారంభానికి ఏపీ వేదిక కాబోతోంది.