కడప జిల్లాలో ప్రభుత్వ భూమి కబ్జా: అధికారుల నిర్లక్ష్యంపై స్థానికుల ఆరోపణలు

ప్రభుత్వ భూముల పరిరక్షణ రెవెన్యూ శాఖ బాధ్యత అని, ఆక్రమణలను ప్రారంభ దశలోనే గుర్తించి అడ్డుకోవాల్సి ఉంటుందని స్థానికులు పేర్కొంటున్నారు. అయితే, ప్రస్తుతం భూమిని దుక్కిదున్నుతున్న విషయం అధికారుల దృష్టికి వచ్చినప్పటికీ తగిన చర్యలు తీసుకోవడం లేదనే విమర్శలు వినిపిస్తున్నాయి.

అధికారులపై అనుమానాలు

పేదవాడు ప్రభుత్వ భూమిలో సాగు చేసుకుంటే వెంటనే అడ్డుకునే రెవెన్యూ సిబ్బంది, ఇప్పుడు ప్రభుత్వ భూమిని దుక్కిదున్నుతున్న వారిపై ఎందుకు చర్యలు తీసుకోవడం లేదు అని పలువురు గ్రామస్తులు ప్రశ్నిస్తున్నారు. అధికారుల వ్యవహారశైలిపై అనుమానాలు వ్యక్తం చేస్తూ, భూమి రికార్డులను పరిశీలించి వాస్తవ పరిస్థితిని ప్రజలకు వెల్లడించాలని వారు కోరుతున్నారు.

సమగ్ర విచారణ డిమాండ్

కనుమలోపల్లి గ్రామ పరిధిలోని సదరు భూమికి సంబంధించిన సర్వే నంబర్లు, ప్రభుత్వ రికార్డులు, భూమి ప్రస్తుత స్థితిపై సమగ్ర విచారణ చేపట్టాలని స్థానికులు డిమాండ్ చేస్తున్నారు. ప్రభుత్వ భూమి ఆక్రమణ నిజమని తేలితే బాధ్యులపై చట్టపరమైన చర్యలు తీసుకోవడంతో పాటు భూమిని ప్రభుత్వ ఆధీనంలోకి తీసుకోవాలని కోరుతున్నారు.

ఈ వ్యవహారంపై మండల రెవెన్యూ అధికారులు స్పందించి, భూమిని పరిశీలించి వాస్తవాలను వెల్లడించాల్సిన అవసరం ఉందని స్థానికులు అభిప్రాయపడుతున్నారు.