ఆన్‌లైన్ గేమింగ్ పేరుతో మోసాలు: ఇద్దరు అరెస్ట్, నగదు, ల్యాప్‌టాప్, ఫో…

కేసు వివరాలను జిల్లా ఎస్పీ శ్రీ యం. రాజేష్ చంద్ర, ఐపీఎస్ వెల్లడించారు. వాట్సాప్ ద్వారా ఆన్‌లైన్ గేమింగ్ లింకులు పంపిస్తూ, పెట్టుబడుల పేరుతో అమాయక ప్రజలను మోసం చేస్తున్నారనే విశ్వసనీయ సమాచారం మేరకు రామారెడ్డి పోలీస్ స్టేషన్‌లో కేసు నమోదు చేసి దర్యాప్తు చేపట్టారు.

జిల్లా ఎస్పీ శ్రీ యం. రాజేష్ చంద్ర, ఐపీఎస్ ఆదేశాల మేరకు, కామారెడ్డి డీఎస్పీ శ్రీ మధుసూదన్ ఆధ్వర్యంలో కామారెడ్డి రూరల్ ఇన్స్పెక్టర్ శ్రీ శ్రీధర్, సీసీఎస్ ఇన్స్పెక్టర్ శ్రీ రామస్, రామారెడ్డి ఎస్ఐ శ్రీ మురళి నేతృత్వంలో ప్రత్యేక పోలీసు బృందాలు ఏర్పాటు చేయబడ్డాయి. సాంకేతిక ఆధారాలు, నిఘా సమాచారాన్ని విశ్లేషిస్తూ ముమ్మర గాలింపు చర్యలు చేపట్టారు.

దర్యాప్తులో భాగంగా కామారెడ్డి బస్టాండ్ వద్ద విశాఖపట్నం వెళ్లేందుకు ప్రయత్నిస్తున్న ఇద్దరు నిందితులను అదుపులోకి తీసుకొని విచారించగా, ప్రధాన నిందితుడు భూక్య నవీన్ @ నరేష్ (26) విదేశాల్లో ఒక ప్రైవేట్ కంపెనీలో పనిచేస్తున్నప్పుడు Future9.com అనే ఆన్‌లైన్ గేమింగ్ వెబ్‌సైట్‌కు సంబంధించిన వివరాలు, మొబైల్ నంబర్ల డేటాను సేకరించినట్లు వెల్లడించాడు.

భారతదేశానికి తిరిగి వచ్చిన అనంతరం వాట్సాప్ ద్వారా పలువురికి ఆన్‌లైన్ గేమింగ్ లింకులు పంపిస్తూ, "పెట్టుబడి పెడితే రెట్టింపు లాభాలు వస్తాయి" అని నమ్మించి ఆన్‌లైన్ మోసాలకు పాల్పడినట్లు విచారణలో తేలింది. నిందితులు బాధితులకు యూజర్ ఐడీలు సృష్టించి వెబ్‌సైట్‌లో పెట్టుబడులు పెట్టేలా ప్రోత్సహించేవారు. వెబ్‌సైట్‌లో నేరుగా చెల్లింపులు జరగని సందర్భాల్లో తమ యూపీఐ (QR కోడ్) ద్వారా నగదు స్వీకరించి, సంబంధిత వెబ్‌సైట్‌లో జమ చేసేవారు. దీనికి ప్రతిఫలంగా వారికి 5 శాతం కమీషన్ అందినట్లు దర్యాప్తులో వెల్లడైంది. ప్రాథమిక దర్యాప్తులో ఈ వెబ్‌సైట్ ద్వారా దేశవ్యాప్తంగా ఎంతో మంది బాధితులు మోసపోయినట్లు గుర్తించారు.

అరెస్ట్ అయిన నిందితులలో భూక్యా నవీన్ @ నరేష్ (26), రామారెడ్డి మండలం, మరియు భూక్యా ప్రవీణ్ (23), రామారెడ్డి మండలం ఉన్నారు. వీరి వద్ద నుంచి ఒక HP ల్యాప్‌టాప్, 4 మొబైల్ ఫోన్లు, రూ.15,000 నగదు స్వాధీనం చేసుకున్నారు.

ఈ కేసులో పరారీలో ఉన్న మరో నిందితుడి కోసం ప్రత్యేక పోలీసు బృందాలు గాలింపు చర్యలు కొనసాగిస్తున్నాయి. కేసుకు సంబంధించిన ఇతర అంశాలపై దర్యాప్తు కొనసాగుతోంది. చాకచక్యంగా వ్యవహరించి నిందితులను పట్టుకోవడంలో విశేష కృషి చేసిన కామారెడ్డి రూరల్ ఇన్స్పెక్టర్ శ్రీ శ్రీధర్, సీసీఎస్ ఇన్స్పెక్టర్ శ్రీ రామన్, రామారెడ్డి ఎస్ఐ శ్రీ మురళి, సైబర్ క్రైమ్ ఎస్ఐ శ్రీ నరేష్ మరియు సిబ్బందిని జిల్లా ఎస్పీ అభినందించారు.

జిల్లా ఎస్పీ శ్రీ యం. రాజేష్ చంద్ర, ఐపీఎస్ మాట్లాడుతూ, "ప్రజలు ఆన్‌లైన్ గేమింగ్, పెట్టుబడులు, ట్రేడింగ్, పార్ట్‌టైమ్ ఉద్యోగాలు, క్యాష్‌బ్యాక్, రెట్టింపు లాభాలు వంటి పేర్లతో సోషల్ మీడియా, వాట్సాప్, టెలిగ్రామ్ తదితర మాధ్యమాల ద్వారా వచ్చే గుర్తు తెలియని లింకులను ఎట్టి పరిస్థితుల్లోనూ నమ్మవద్దు. తక్కువ సమయంలో అధిక లాభాలు వస్తాయని చెప్పే వెబ్‌సైట్లు, యాప్‌లు, వ్యక్తుల మాటలను గుడ్డిగా విశ్వసించి నగదు పంపించడం వల్ల ఆర్థిక మోసాలకు గురయ్యే ప్రమాదం ఉంది. ఏదైనా వెబ్‌సైట్ లేదా యాప్‌లో పెట్టుబడి పెట్టే ముందు దాని విశ్వసనీయతను పూర్తిగా నిర్ధారించుకోవాలి. ఒకవేళ ఆన్‌లైన్ మోసాలకు గురైతే ఏమాత్రం ఆలస్యం చేయకుండా వెంటనే సైబర్ క్రైమ్ హెల్ప్‌లైన్ 1930కు ఫోన్ చేయాలి లేదా www.cybercrime.gov.in వెబ్‌సైట్‌లో ఫిర్యాదు నమోదు చేయాలి. అలాగే సమీప పోలీస్ స్టేషన్‌లో వెంటనే ఫిర్యాదు చేస్తే, సకాలంలో చర్యలు తీసుకుని బాధితులు కోల్పోయిన నగదును హోల్డ్ పెట్టి తిరిగి వచ్చేలా చేసే అవకాశాలు మెరుగవుతాయి" అని సూచించారు.