ఢిల్లీలోని జంతర్ మంతర్ వద్ద జూలైలో జరిగిన విద్యార్థుల నిరసనల్లో పోలీసులు అత్యుత్సాహంగా వ్యవహరించారన్న ఆరోపణలపై సుప్రీంకోర్టు కీలక ఆదేశాలు జారీ చేసింది. ఈ ఘటనలపై విచారణ జరుపుతున్న ఉన్నతస్థాయి కమిటీ నెల రోజుల్లోగా ప్రాథమిక నివేదికను సమర్పించాలని ఆదేశించింది. ఫిర్యాదులు తక్కువగా వచ్చాయని విచారణను ఆలస్యం చేయకుండా, ఇప్పటికే అందుబాటులో ఉన్న ఆధారాల ఆధారంగా విచారణను కొనసాగించాలని స్పష్టం చేసింది.
ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం ఈ ఆదేశాలు ఇచ్చింది. ఈ ఏడాది జూలైలో జంతర్ మంతర్ వద్ద కాక్రోచ్ జనతా పార్టీ (సీజేపీ) ఆధ్వర్యంలో విద్యార్థులు నిరసనలు చేపట్టారు. నీట్ సహా పలు పోటీ పరీక్షల ప్రశ్నపత్రాల లీకేజీ ఆరోపణలపై ఆందోళన నిర్వహించారు.
తాజా వార్తలు, అప్‌డేట్స్ అన్నీ మీ దగ్గర!
రోజువారీ వార్తలు మీ ఇన్‌బాక్స్‌కి పొందండి
ఈ క్రమంలో పార్లమెంట్ వైపు ర్యాలీగా వెళ్లేందుకు ప్రయత్నించిన నిరసనకారులను పోలీసులు అడ్డుకున్నారు. ఆ సమయంలో లాఠీచార్జి, భాష్పవాయు గోళాలు, పెల్లెట్ గన్స్ వినియోగించారని, పలువురు విద్యార్థులు గాయపడ్డారని పిటిషనర్లు ఆరోపించారు. మహిళా నిరసనకారులపై దాడులు, వేధింపులు జరిగినట్లు కూడా ఫిర్యాదులు వచ్చాయి.
