ఓటర్ల జాబితాలో అవకతవకలు: ఎన్నికల అధికారి రాజీనామా చేయాలి - ఇండియా కూటమి

ఓటర్ల జాబితా సవరణ యంత్రాంగం నిష్పాక్షికంగా, పారదర్శకంగా వ్యవహరించి ఉంటే పరిస్థితి ఇంతవరకు వచ్చేది కాదని నాయకులు అన్నారు. ప్రస్తుత ఎన్నికల ప్రధాన అధికారి జ్ఞానేష్ కుమార్ కేంద్ర హోంమంత్రి అమిత్ షా ఆదేశాలకు అనుగుణంగా నడుచుకుంటున్నారనే ఆరోపణలు వచ్చాయని తెలిపారు. ప్రధాని మోడీ, అమిత్ షాతో కలిసి జ్ఞానేష్ కుమార్ వ్యవహరిస్తున్నారనే వార్తలపై ప్రభుత్వం స్పష్టత ఇవ్వలేదని వారు పేర్కొన్నారు.

ఓటర్ల నమోదులో ఫారం-6పై అనుమానాలు వ్యక్తమైనప్పుడు అధికారులపై చర్యలు తీసుకుని ఉంటే పరిస్థితి చక్కబడేదన్నారు. జ్ఞానేష్ కుమార్ ఫారం-6ను చట్టవిరుద్ధంగా, ఏకపక్షంగా మార్చారని, బీజేపీకి సహాయం చేయడానికి పదవిని దుర్వినియోగం చేస్తున్నారని నాయకులు ఆరోపించారు.

అనంతరం జాతీయ గీతం ఆలపించి, భారత రాజ్యాంగంలోని ఆర్టికల్ 326ను అందరితో చదివించారు.

నిబంధనలకు వ్యతిరేకంగా వ్యవహరించి, బీజేపీకి పరోక్షంగా సహాయపడినందున ఎన్నికల ప్రధాన అధికారి జ్ఞానేష్ కుమార్ తక్షణమే రాజీనామా చేయాలని ఇండియా కూటమి నాయకులు డిమాండ్ చేశారు.

ఈ ర్యాలీలో కాంగ్రెస్, సీపీఐ, సీపీఐ (ఎం), ఆమ్ ఆద్మీ పార్టీ, బీఎస్పీ, సీపీఐ (ఎంఎల్) తదితర పార్టీల నాయకులు, కార్యకర్తలు పెద్ద సంఖ్యలో పాల్గొన్నారు.